Innlent | mbl | 26.5.2021 | 10:45 | Uppfært 18:13

Fimm smit innanlands í gær

Í einhverjum löndum er farið að bjóða fólki upp á að taka sýni sjálft. AFP

Fimm greindust með kórónuveiruna innanlands í gær. Þeir greindust allir við einkennasýnatöku en þrír voru í sóttkví eða 60%. Tveir bíða niðurstöðu mótefnamælingar eftir skimun á landamærunum í gær en alls voru tekin 1.232 sýni þar. Innanlands voru tekin 889 sýni í gær.

Nú eru 38 í einangrun og 101 í sóttkví. Einn er á sjúkrahúsi vegna Covid-19. Í skimunarsóttkví eru 1.634.

Smitum fækkar á Norðurlandi vestra

Eitt barn yngra en eins árs er með Covid á Íslandi en ekkert barn á aldrinum 1-5 ára er með smit. Eitt barn á aldrinum 6-12 ára er í einangrun. Fjögur smit eru í aldurshópnum 13-17 ára og sex á aldrinum 18-29 eru með Covid. Tólf smit eru í aldurshópnum 30-39 ára og 10 meðal 40-49 ára. Þrjú smit eru meðal fólks á sextugsaldri og eitt hjá 60-69 ára.

Ekkert smit er á Suðurnesjum, Austurlandi, Norðurlandi eystra og Vestfjörðum en á Vesturlandi er nú eitt smit. Á höfuðborgarsvæðinu eru 19 í einangrun og 75 í sóttkví. Á Suðurnesjum eru þrír í sóttkví. Á Suðurlandi eru smitin þrjú talsins og sex í sóttkví. Á Norðurlandi vestra eru 11 í einangrun og tveir eru í sóttkví. Fjórir eru í sóttkví á Vesturlandi. Fjögur smit eru óskráð í hús og ellefu sem eru í sóttkví.

Nýgengi smita innanlands á hverja 100 þúsund íbúa síðustu tvær vikur er 7,6 og 2,7 á landamærunum.

Færeyjar komnar á lista yfir áhættusvæði

Sóttvarnalæknir hefur ákveðið að setja Færeyjar aftur á lista yfir skilgreind áhættusvæði Covid-19 vegna vaxandi nýgengi smita þar í landi.

Ferðamenn sem koma frá Færeyjum eru því ekki lengur undanþegnir sóttvarnaaðgerðum á landamærum og sömu reglur gilda því um þá og eiga almennt við um farþega sem koma til Íslands.

Öll lönd og svæði heims nema Grænland teljast áhættusvæði vegna Covid-19.