Kópavogsbær fær viðurkenningu fyrir innleiðingu Barnasáttmála

Kópavogsbær fékk í dag afhenta viðurkenningu í tilefni þess að bærinn hefur innleitt Barnasáttmála Sameinuðu þjóðanna. 

Með viðurkenningunni er Kópavogur kominn í hóp barnvænna sveitarfélaga, en hugmyndafræði þeirra byggir á alþjóðlegu verkefni UNICEF. 

Þau Birna Þórðardóttir, framkvæmdastjóri UNICEF á Íslandi, og Ásmundur Einar Daðason, félags- og barnamálaráðherra afhentu viðurkenninguna og Ármann Kr. Ólafsson, bæjarstjóri Kópavogs, Anna Elísabet Ólafsdóttir, verkefnastjóri innleiðingarinnar, Ingunn Sif Isorena Þórðardóttir og Eiríkur Örn Beck, sem setið hafa í stýrihóp innleiðingarinnar hjá Kópavogsbæ, tóku við henni fyrir hönd bæjarins.

Unnið hefur verið að innleiðingu Barnasáttmála Sameinuðu þjóðanna frá árinu 2018 en bæjarstjórn Kópavogs samþykkti í maí það ár að innleiða Barnasáttmálann hjá bænum.

Kópavogur er ann að sveitarfélagið á Íslandi til að hljóta viðurkenningu sem barnvænt sveitarfélag. 

„Það er mikið ánægjuefni að fagna uppskeru þrotlausrar vinnu síðastliðinna þriggja ára við innleiðingu Barnasáttmála Sameinuðu þjóðanna í Kópavogi, en Kópavogur er meðal fyrstu sveitarfélaganna til að hefja þessa vegferð hér á landi og hefur rutt brautina með metnaðarfullum hætti fyrir þau fjölmörgu sveitarfélög sem nú feta í þau fótspor. Við erum bara rétt að byrja og höfum sett okkur það markmið að að minnsta kosti 80% barna á Íslandi búi í sveitarfélagi sem vinnur eftir hugmyndafræði barnvænna sveitarfélaga fyrir árslok 2024,“ sagði Ásmundur Einar Daðason, félags- og barnamálaráðherra við tilefnið. 

• Blogga um frétt