Garðhúsgögn, trampólín og þakplötur

Björgunarsveitir hafa verið kallaðar út í einstaka verkefni það sem af er degi, flest vegna foks á lausamunum. Davíð Már Bjarnason, upplýsingafulltrúi Landsbjargar, segir við mbl.is að almennt hafi verið rólegt í dag en að mögulega sé að bæta í. 

Tvær tilkynningar bárust björgunarsveitum vegna fokinna garðhúsgagna á Suðurnesjum og svo barst Davíð til eyrna tilkynning um fok á þakplötum á Eyrarbakka, á meðan hann ræddi við mbl.is.

Þá segir hann að eitthvað hafi verið um útköll í höfuðborginni, meðal annars vegna lausamuna og veislutjalda og gefur í skyn að einhverjar sumarlegar útskriftarveislur utandyra hafi fokið út í veður og vind. 

Lögreglumenn í Askalind í Kópavogi að bjarga því sem bjarga má. Ljósmynd/Aðsend

Slökkviliðið létti undir

Fyrr í dag fauk sendibíll út af vegi við álverið í Straumsvík. Varðstjóri slökkviliðsins á höfuðborgarsvæðinu sagði að bílstjóri sendibílsins hafi verið einn í bílnum og sloppið með skrámur. Auk þess sagði hann að slökkviliðið á höfuðborgarsvæðinu hefði tekið að sér verkefni í dag er snúa að foknum trampólínum og garðhúsgögnum. Þannig létti slökkviliðið undir með björgunarsveitum. 

Þá segir Skúli Jónsson, aðstoðaryfirlögregluþjónn lögreglunnar á höfuðborgarsvæðinu, að lögreglan hafi haft í nógu að snúast í dag. 

Frétt af mbl.is

Sendibíll fauk út af veginum

Umferðarljós fuku um koll á vinnusvæði í Garðabæ. Ljósmynd/Aðsend

Gul viðvörun fram á nótt

Spádeild Veðurstofu Íslands segir að veðrið suðvestanlands batni ekkert fyrr en líður á helgina. Gul veðurviðvörun er í gildi og mun verða fram á nótt að sögn sérfræðings veðurstofu. 

Frétt af mbl.is

Útlit fyrir nokkurn lægðagang

Undir Hafnarfjalli hafa hviður farið upp í allt að 39 metra á sekúndu og á Kjalarnesi og í Kollafirði hefur veðrið verið svipað. Það er því lítið ferðaveður og ferðamenn með aftanívagna ættu að gæta sín – það er enda forsenda gulu veðurviðvörunarinnar.

„Þröskuldurinn lækkar þegar svona er, föstudagssíðdegi að sumri til og margir á leið út á land. Í venjulegu árferði væri kannski ekki tilefni til viðvörunar en þegar við vitum að margir eru að ferðast með eftirvagna þá breytast forsendurnar,“ segir sérfræðingur veðurstofu við mbl.is. 

• Blogga um frétt