Tveir nýir oddvitar valdir í dag
Setja bókamerki
Tveir nýir oddvitar Sjálfstæðisflokksins verða valdir í prófkjörum flokksins í Norðausturkjördæmi og Suðurkjördæmi í dag.
Tveir bjóða sig fram til forystu í hvoru kjördæmi, en sitjandi oddvitar hverfa báðir af þingi í haust.
Í Norðausturkjördæmi stendur oddvitaslagurinn milli Njáls Trausta Friðbertssonar þingmanns og Gauta Jóhannessonar, forseta sveitarstjórnar Múlaþings. Kristján Þór Júlíusson sjávarútvegsráðherra hefur verið oddviti flokksins í kjördæminu.
Sjö til viðbótar gefa kost á sér í prófkjörinu. Kosið verður á fjórtán stöðum í kjördæminu og má nálgast kjörstaði og afgreiðslutíma hér.
Samkvæmt upplýsingum frá kjörstjórn má eiga von á fyrstu tölum upp úr klukkan tíu í kvöld, en búast má við lokatölum upp úr miðnætti og verður tilkynningunni streymt á Facebook-síðu flokksins.
Í Suðurkjördæmi keppast Vilhjálmur Árnason þingmaður og Guðrún Hafsteinsdóttir, markaðsstjóri Kjöríss og fyrrverandi formaður Samtaka iðnaðarins, um efsta sætið.
Páll Magnússon oddviti tilkynnti fyrr á árinu að hann sæktist ekki eftir sæti á lista, en hann hefur átt erfitt uppdráttar allt frá því hann forðaðist að lýsa yfir stuðningi við framboð flokksins í bæjarstjórnarkosningum í Vestmannaeyjum þegar klofningsframboð ósáttra sjálfstæðismanna bauð þar fram.
Sjö til viðbótar gefa kost á sér. Kosið verður á fjórtán stöðum víðs vegar um kjördæmið víðfeðma, en kjörstaði og afgreiðslutíma má finna hér. Birta á fyrstu tölur klukkan átta í kvöld en gert er ráð fyrir að talningu ljúki skömmu eftir miðnætti.
Meðvitundarlaus kona dregin upp úr Silfru
Bjóða í jarðir til að kolefnisjafna
Rannsókn enn í gangi og beðið niðurstöðu krufningar
Líkfundur: „Höfum grun um hvaða maður þetta er“
Gosmóða víða um land og hraun „bunkast upp“
Vandinn er meiri en margur heldur
Alvarleg staða og erfið hjá kennurum