„Ekki viss um að þetta fylli upp í mönnunargatið“

„Mín fyrstu viðbrögð eru að þetta sé ekki nóg,“ segir Fjölnir Sæmundsson, formaður landssambands lögreglumanna í ljósi frétta um að lögregluembættið fái 900 milljónir til að mæta styttingu vinnuvikunnar.

Ríkisútvarpið greindi frá fjárveitingunni.

Fjölnir segir í samtali við mbl.is að peningnum fylgi ákveðinn léttir og að upphæðin brúi eitthvað bil. 

„Þetta er vissulega gott en ég er ekki viss um að þetta fylli upp í mönnunargatið.“

Hann segist hafa verið í sambandi við félaga sína innan sambandsins eftir fréttir kvöldsins og séu þeir allir sammála um að þetta nægi ekki fyrir mjög mörgum lærðum lögreglumönnum. 

Frétt af mbl.is

Stytting vinnuviku flókin en líka nauðsynleg

Snýst um meira en sumarið

Í frétt ríkismiðilsins segir Sigríður Björk Guðjónsdóttir ríkislögreglustjóri að ekki sé verið að greiða fyrir meiri aukavinnu en verið að greiða fyrir styttingu vinnutímans, „þannig að við séum að jafnaði með 8 tíma vinnudag vaktavinnufólks“.

Fjölnir bendir á að inn í tölur frá lögreglustjórunum, sem þarfagreiningin byggi á, vanti til dæmis að gera ráð fyrir búnaði lögreglumanna sem sé hátt í milljón á mann og vaktaálagi eða yfirvinnu. 

„Þetta snýst um meira en bara sumarið. Auðvitað er hægt að ráða ódýrari starfsmenn í afleysingar en það leysir ekki vandann.“

• Blogga um frétt