Innlent | mbl | 3.6.2021 | 15:08 | Uppfært 16:23

Dæmdur ósakhæfur vegna brunans á Bræðraborgarstíg

Marek Moszcynski er ásakaður um íkveikju í fyrra með þeim afleiðingum að þrír létust. mbl.is/Kristinn Magnússon

Marek Moszcynski var sýknaður af refsikröfu ákæruvaldsins rétt í þessu fyrir að hafa kveikt í húsi á Bræðraborgarstíg síðasta sumar með þeim afleiðingum að þrír létust. Marek er þó sakfelldur fyrir allar ákærur nema fyrir þá einstaklinga sem voru í viðbyggingu hússins, þar sem þeir voru ekki í lífshættu.

Honum verður gert að sæta öryggisgæslu á viðeigandi stofnun vegna ósakhæfis og verður hann strax fluttur á réttargeðdeild í dag úr fangelsi.

Marek er gert að greiða aðstandendum þeirra þriggja sem létust í brunanum og þeir sem urðu fyrir líkams- eða eignatjóni um 30 milljónir króna í bætur. Málskostnaður verður greiddur úr ríkissjóði.

Marek mætti ekki sjálfur í dómssal.

Aðalmeðferð í málinu hófst í apríl en Kolbrún Benediktsdóttir varahéraðssaksóknari er saksóknari í málinu.

Úr dómsalnum í héraðsdómi skömmu áður en dómurinn var kveðinn upp. mbl.is/Eggert Jóhannesson

Marek neitaði sök um manndráp og íkveikju við þingfestingu málsins síðasta haust. Þrír geðlæknar hafa metið manninn ósakhæfan og staðfestu þeir þar með fyrra mat geðlækna.

Frétt af mbl.is

Var augljóslega mjög veikur

Í ákærunni er maðurinn sagður hafa kveikt eld á gólfi í herbergi sínu á annarri hæð, á tveimur stöðum á gólfi í sameiginlegu rými á sömu hæð og undir stiga sem sem lá upp á þriðju hæð hússins. Þar kemur jafnframt fram að þegar hann hafi kveikt eldinn hafi 13 manns verið í húsinu og var húsið orðið nær alelda þegar slökkvistarf hófst.

Frétt af mbl.is

Lýsingar vitna vöktu óhug í dómsal

Þrjú létust í brunanum, 24 ára kona, 21 árs karlmaður og 26 ára kona. Kemur fram í ákærunni að þau tvö fyrrnefndu hafi látist af völdum koloxíðeitrunar við innöndun á reyk, en hin konan látist þegar hún féll niður af þriðju hæð þegar hún reyndi að flýja eldinn.