Innlent | mbl | 9.6.2021 | 11:32 | Uppfært 14:19

Örtröð við Höllina: „Þetta er alveg fáránlegt!“

Röðin til að komast í bólusetningu í Laugardalshöll í dag er mjög löng. mbl.is/Kristinn Magnússon

Mikil örtröð er við Laugardalshöllina þar sem margir freista þess að fá sína seinni sprautu af bóluefni AstraZeneca gegn kórónuveirunni.

Þúsundir hafa fengið formlegt boð um að mæta og þúsundir freista gæfunnar hafandi ekkert boð fengið um að mæta í dag. Þrátt fyrir það virðast allir þurfa að bíða í sömu biðröðinni, sem nær nú upp á Suðurlandsbraut og langt aftur um nærliggjandi götur.

Frétt af mbl.is

„Áríðandi tilkynning“ til fólks sem ekki fékk boð

Við þetta er Hlynur Jónsson Arndal ekki sáttur, en hann fékk boð um að mæta í dag og þiggja sína seinni AstraZeneca-sprautu. Kona hans á svo tíma klukkan 14:20. Hlynur er staddur við Laugardalshöll og skilur ekki hvernig þeir, sem boð hafa fengið um að mæta í dag, eiga eiginlega að bera sig að.

Röðin nær upp á Reykjaveg og Suðurlandsbraut. mbl.is/Kristinn Magnússon

Fólk í forgangi en bíður í sömu röð

„Þetta er alveg fáránlegt!“ segir hann við mbl.is.

„Maður fær boð um að mæta hérna og þarf svo að bíða í röð eins og þeir sem fengu ekki boð. Maður botnar bara ekki í þessu.“

Í dag barst „áríðandi tilkynning“ frá Heilsugæslunni á höfuðborgarsvæðinu þar sem fólk, sem ekki hafði fengið formlega boðun um að mæta í dag, var beðið um að bíða þar til eftir klukkan 14 í dag. Er þá átt við þá sem freista þess að fá síðari AstraZeneca-sprautu sína.

„Þeir auglýsa það svo að þetta eigi að klárast fyrir klukkan tvö og þá megi hver sem er mæta í seinni sprautuna, en konan mín á boð klukkan 14:20. Maður skilur náttúrlega bara ekkert í þessu, þetta eru bara vitleysingar sem stýra þessu. Það er ekkert skipulag og maður veit bara ekkert hvernig maður á að bera sig að til þess að komast á þeim tíma sem maður var boðaður.“

Einhver þúsund bíða þess að komast í bólusetningu. mbl.is/Kristinn Magnússon

Reyndi að fá svör

Hlynur lét ekki bjóða sér að standa í röð, sem virðist ætla að taka rúman klukkutíma að klára, heldur fór hann að anddyri Laugardalshallar í þeirri von um að fá svör við hvernig ætti að bera sig að. Það var fýluferð.

„Anddyrið er stappað. Svo er fólk þarna í óðaönn bara við að reyna að stýra mannfjöldanum inn og það gat enginn sagt neitt af eða á.“

„Þeir segja að maður sé í einhverjum forgangi en svo veit maður ekkert hvernig maður á að bera sig að. Fólk er að fá frí úr vinnu og er jafnvel að fresta læknatímum og öðru til þess að koma þarna. Þetta er náttúrlega bara fáránlegt,“ segir Hlynur og er augljóslega ekki sáttur.

Þar að auki reyndi Hlynur að finna upplýsingar á vef heilsugæslunnar um hvernig hann ætti að bera sig að, en hafði ekki erindi sem erfiði.