Hröð fjölgun ferðamanna
Setja bókamerki
Ferðamönnum í Eurovisionbænum Húsavík hefur fjölgað mjög og hefur það gerst hratt á undanförnum vikum og dögum.
„Við sjáum talsverða aukningu ferðafólks og það gerðist hratt. Núna bara á undanförnum tveimur vikum sjáum við talsvert meira af ferðafólki í bænum. Við erum ekki með mælingar í gangi núna en maður heyrir það og sér á ferðaþjónustuaðilum, bæði hvalaskoðunarfyrirtækjum og veitingastöðum, sem merkja mikla aukningu,“ segir Silja Jóhannesdóttir, forstöðumaður Húsavíkurstofu.
Silja segir að aðallega sé um erlenda ferðamenn að ræða en Íslendingar fari seinna af stað. Hún er bjartsýn á sumarið.
„Við vonumst til að halda áfram með innanlandsmarkaðinn í bland við að erlendum ferðamönnum fjölgi. Eftir erfitt ár í fyrra eru margir auðvitað ennþá að reyna að ná vopnum sínum. Ég hugsa að þetta sumar verði talsvert betra en í fyrra og við vonum að það nægi til að fólk geti allavega haldið áfram. Það er náttúrlega gríðarlega mikilvægt fyrir bæinn að þessi þjónusta sem fylgir ferðaþjónustu sé til staðar fyrir íbúa,“ segir hún.
Ætla að opna Eurovisionsafn
Enginn vafi leiki á að Eurovisionævintýrið hafi ýtt undir komu ferðamanna til bæjarins. Ferðamenn spyrji mikið um staðina þar sem Eurovisionmyndin var tekin upp.
„Það er stefnt á að opna Eurovisionsafn, við erum búin að gera varanlegan rauðan dregil, við erum að fara að setja upp biðskýli, við ætlum að merkja höfnina og við munum markaðssetja okkur áfram sem Eurovisionbæ og auðvitað nýta tækifærið í hvert einasta skipti sem það er Eurovision til að minna á okkur.
Samkvæmt skýrslum að utan þar sem aðrir staðir hafa notið góðs af því að kvikmyndir hafi verið teknar upp hjá þeim þá er ekki spurning að við munum njóta góðs af þessu ef við spilum rétt úr spilunum,“ segir Silja.
Lýsa yfir stuðningi við kennara
Klúr skrif beindust einnig gegn börnum
Áfram óvissustig vegna skriðuhættu
Við urðum að byrja upp á nýtt
„Það var bara allt í kássu“
Telur njósnirnar vega að lýðræðinu á Íslandi
Spá illviðri víða um land á morgun