Engir einnota pokar í Vínbúðunum

ÁTVR hefur ákveðið að frá og með næstu mánaðamótum verði ekki hægt að fá einnota poka í Vínbúðunum. Eins og fram hefur komið í Morgunblaðinu taka nýjar reglur stjórnvalda gildi í júlí sem banna sölu á einnota pokum við afgreiðslukassa verslana.

Þessar reglur taka til allra einnota poka, einnig lífbrjótanlegra poka, til að mynda maíspoka sem margir töldu að kæmu í stað gömlu plastpokanna og hafa náð talsverðri útbreiðslu. Matvöruverslanir munu ætla að selja maíspokana áfram en það verður óheimilt á skilgreindum kassasvæðum. Pokana verður því að finna inni í miðjum verslunum.

Í tilkynningu á vefsíðu ÁTVR er því lýst yfir að fyrirtækið láti sig umhverfisvernd varða og hún sé stór liður í samfélagsábyrgð þess.