Bandaríski ferðamaðurinn sem leitað hefur verið að við gosstöðvarnar í Geldingadölum síðan í gær heitir Scott Estill og er 59 ára, grannvaxinn og vel á sig kominn. Hann sást síðast við hraunkantinn austast í Meradölum þar sem hann varð viðskila við eiginkonu sína. 

Scott er með DSLR-myndavél með litríkri hálsól og er hann í brúnum gönguskóm.

Lögreglan á Suðurnesjum hefur birt af honum ljósmyndir og biðlar til göngufólks sem man eftir að hafa séð hann að skoða meðfylgjandi kort af gossvæðinu. Lögreglan biður fólk að merkja með x í reit á kortinu þar sem fólk telur sig hafa séð hann. „Eða láta okkur vita um reit og númer og senda okkur skilaboð hér á Facebook eða hafa samband við 1-1-2,“ segir í tilkynningu lögreglunnar á Facebook sem má deila sem víðast. 

Uppfært klukkan 20:13: Maðurinn er fundinn heill á húfi.