Óvíst hvenær ferðabanninu verður aflétt

Talsmaður sendiráðs Bandaríkjanna á Íslandi, Patrick Geraghty, segir vísindin verða að ráða því hvenær ferðabanni Bandaríkjanna gagnvart Íslandi og öðrum Schengen-ríkjum verður aflétt.

Ferðabann til Bandaríkjanna gagnvart íbúum Schengen-ríkjanna, þar á meðal Íslands, vegna kórónuveirufaraldursins hefur verið í gildi síðan í mars í fyrra.

Frétt af mbl.is

Ferðabann Trumps gildir um Ísland

Íslendingar hafa því ekki getað ferðast til Bandaríkjanna í á annað ár nema þeir falli undir sérstaka undanþágu. Undanþágur eiga til dæmis við um námsmenn í skólum í Bandaríkjunum, vísindamenn og þá sem þurfa að sinna nauðsynlegum viðskiptaerindum.

Bólusettir Bandaríkjamenn geta þó ferðast til Íslands og annarra landa í Evrópu. 

„Öryggi borgara og ferðafólks er forgangsatriði fyrir Bandaríkin líkt og aðrar þjóðir, þar á meðal Ísland. Ferðatakmarkanir voru upprunalega settar á vegna þess sem vísindin sögðu til um á þeim tíma,“ segir Patrick.

Óljóst hvort opnað verður fyrir öll ríki í einu

„Við hlökkum til þess þegar ferðalög yfir Atlantshafið hefjast að nýju um leið og vísindin leyfa. Þau verða að ráða för. Ég get ekki sagt nákvæmlega hvenær létt verður á takmörkunum eða þær afnumdar. Ákvarðanir um það eru teknar í samræmi við vísindin og ráðleggingar frá Sóttvarnastofnun Bandaríkjanna og heilbrigðis- og félagsmálaráðuneyti Bandaríkjanna,“ segir hann. 

Frétt af mbl.is

Ferðalög frá Bandaríkjunum til Evrópu heimil

Spurður hvort Bandaríkin muni opna fyrir öllum Schengen-ríkjum í einu eða hvort þau íhugi að opna fyrst fyrir ferðalög frá þeim löndum þar sem stór hluti íbúa hefur verið bólusettur og staða faraldursins er góð, eins og á Íslandi, segist Patrick ekki geta sagt til um það þar sem slíkar ákvarðanir verði teknar í Hvíta húsinu.

Hann ráðleggur öllum að fylgjast vel með vefsíðu sendiráðsins, sem og covid.is, þar sem nýjar upplýsingar eru færðar inn.

• Blogga um frétt