Fékk nýja rafskútu í stað skútunnar sem var stolið

Aldís Ósk Björnsdóttir, sem lenti í þeirri óskemmti­legu reynslu fyrir um viku að raf­hlaupa­hjól­inu henn­ar var stolið, hefur nú fengið nýtt hjól í hendurnar eftir að áhrifavaldurinn Edda Falak hrinti af stað söfnun fyrir Aldísi.

Aldís not­ar ferðaþjón­ustu fatlaðra til þess að kom­ast á milli staða. Hlaupa­hjólið veitir henni frelsi þar sem hún getur kom­ist á milli staða á því án þess að vera upp á aðra kom­in. Því varð Aldís að sjálfsögðu mjög leið þegar hjólið hvarf. 

Frétt af mbl.is

Hjólinu sem veitti Aldísi frelsi stolið

Datt ekki í hug að svo margir myndu vilja hjálpa

„Þegar Aldís Ósk bað mig um að auglýsa eftir rafskútunni sem var stolið þá datt okkur aldrei í hug hvað margir myndu bjóðast til að hjálpa,“ skrifar Brynhildur Diego Kolbeinsdóttir, systir Aldísar, um málið í færslu sem hún gaf mbl.is leyfi til að birta. 

Ekki var nóg með að Aldís fengi nýja rafskútu, hún fékk einnig hjálm, lás og aukahluti. 

„Takk Edda Falak fyrir að koma af stað söfnun og takk allir sem tóku þátt, hringdu, sendu skilaboð eða deildu,“ skrifar Brynhildur.

• Blogga um frétt