Sendiherra Japans nærri því fokinn við gosstöðvarnar

Nýr sendiherra Japans á Íslandi, Ryotaro Suzuki, heimsótti gosstöðvarnar í Geldingadölum í dag. Hann segir að rok á svæðinu hafi verið svo mikið að hann hafi verið nærri því að fjúka í burtu. 

Frá þessu greinir Suzuki á Twitter þar sem hann hefur vakið mikla lukku frá því að hann tók við embætti í síðasta mánuði.

Suzuki greindi frá því á Twitter á föstudag að hann hygðist fara á gosstöðvarnar, en færsluna skrifaði hann að hluta til á íslensku. 

Þá hefur Suzuki m.a. hitt Bjarna Benediktsson fjármálaráðherra á fyrstu vikum embættistíðar sinnar. Í færslu af því tilefni sagði sendiherrann Bjarna afar myndarlegan og hávaxinn. „Að standa við hlið hans lætur mig líta út fyrir að vera lítill,“ skrifar hann. 

Suzuki hefur auk þess fundað með sendiherra Bretlands á Íslandi, Ólafi Ragnari Grímssyni, Guðna Th. Jóhannessyni og Stefáni Jóhannessyni, sendiherra Íslands í Japan, ásamt því að hafa mætt á götugrill, en fataval fyrir grillið vafðist aðeins fyrir sendiherranum. 

• Blogga um frétt