Hitaveita Veitna mun á morgun, þriðjudaginn 20. júlí, breyta afhendingu heits vatns í þeim hverfum Reykjavíkur sem liggja vestan Elliðaár og á Kjalarnesi.
Þau hverfi verða þá aftur sett á vatn úr borholum á jarðhitasvæðum í Reykjavík og Mosfellsbæ.
Í byrjun júní voru þessi hverfi sett á upphitað vatn frá virkjunum ON á Hellisheiði og á Nesjavöllum til þess að létta á vinnslu úr jarðhitasvæðunum. Tilgangurinn var að tryggja sjálfbæran rekstur þeirra um ókomna framtíð og á sama tíma nýta betur framleiðslugetu virkjananna, að því er segir í tilkynningu.
Vatnsskiptaaðgerðin er þannig skipulögð að ekki á að koma til truflana á afhendingu en einhverjir gætu orðið varir við minniháttar truflanir.
Þeir ættu þó ekki að finna mun á vatninu enda ekki marktækur munur á þessum tveimur tegundum heits vatns.
Engar breytingar á hitastigi eða þrýstingi verða í hitaveitunni við skiptin.