Innlent | mbl | 21.7.2021 | 20:16 | Uppfært 22:26

80 manns vilja selja þjóðhátíðarmiða sína

Frá Þjóðhátíð 2018. Ófeigur Lýðsson

Hörður Orri Grettisson, formaður þjóðhátíðarnefndar ÍBV, segir nefndina ennþá stefna að því að halda hefðbundna Þjóðhátíð um verslunarmannahelgina þrátt fyrir uppsveiflu í faraldrinum. Um 80 hátíðarmiðar eru nú í endursölu í facebookhópnum Þjóðhátíð í Eyjum.

Þórólfur Guðnason sóttvarnalæknir hefur viðrað áhyggjur af hópsmiti á Þjóðhátíð: „Á stað eins og Þjóðhátíð getur einn einstaklingur fengið ansi mikið og útbreitt smit eftir eina helgi sem væri mjög erfitt að eiga við. Við gætum fengið hundruð og þúsundir smita eftir slíkt.“

Frétt af mbl.is

44% á aldrinum 18-29 ára

Forsala kláraðist fyrir helgi

Hörður segir nokkra hafa óskað eftir endurgreiðslu á hátíðarmiðum en miðasala gangi annars sinn vangang, forsala hafi klárast fyrir helgi: „Það eru fleiri að kaupa miða en óska eftir endurgreiðslu, við getum orðað þetta þannig,“ segir Hörður í samtali við mbl.is.

Í facebookhópnum Þjóðhátíð í Eyjum settu fjölmargir miðana sína á sölu í kjölfar frétta af þeim 56 smitum sem greindust innanlands í gær. Um 80 miðar á þjóðhátíð hafa verið auglýstir til sölu seinasta sólarhringinn samanborið við aðeins tæpa 20 fyrir rúmri viku þann 12. júlí.

Frétt af mbl.is

Búast má við að fólk veikist alvarlega

Viðbragðsáætlanir frá því í fyrra

Hörður Orri segir enga eiginlega varaáætlun í kortunum fari svo að stjórnvöld herði takmarkanir í einhverjum mæli. „Við höfum rætt málið en það er ekkert á borðinu eins og er. Við búum að áætlunum frá því í fyrra en eins og leikar standa nú miðast allt við að við munum halda eðlilega Þjóðhátíð.“