Átján ára frönsk stúlka lést er hún féll niður bratta hlíð við göngu í Súlum í Stöðvarfirði í gær. Þetta kemur fram á facebooksíðu lögreglunnar á Austurlandi.
Tilkynning barst lögreglu um klukkan 17 og voru lögregla, björgunarsveitir, sjúkralið á Austurlandi og þyrla Landhelgisgæslunnar ræst út.
Konan var hluti af sjálfboðaliðahópnum Veraldarvinum sem unnið hafa sjálfboðaliðastarf á Austurlandi í fjölda ára, að sögn lögreglunnar.
Í færslu lögreglunnar á Austurlandi segir að aðstæður á vettvangi hafi verið erfiðar og ljóst að björgunaraðilar unnu þrekvirki við störf sín.
Lögreglan á Austurlandi vinnur að rannsókn slyssins.