Innlent | mbl | 13.8.2021 | 15:38

Gagnrýnir KSÍ og bendir á frásögn af hópnauðgun

Hanna Björg segir að til séu fleiri frásagnir af landsliðsmönnum og ofbeldi af þeirra hálfu.

Hanna Björg Vilhjálmsdóttir, framhaldsskólakennari og forkona jafnréttisnefndar Kennarasambands Íslands, segir að Knattspyrnusambandi Íslands hafi hvorki tekist að vera afgerandi í jafnréttismálum, né náð miklum árangri á því sviði.

Í pistli sem birtist á Vísi í dag bendir hún á að uppeldishlutverk KSÍ sé stórt og mikið.

„Börn, ungmenni og fullorðið fólk líta upp til þeirra leikmanna sem vel gengur og þeir eru dýrkaðir og dáðir. Þau sem lengst ná eru fyrirmyndir þúsunda, það er mikil ábyrgð.“

„Lýsingin á ofbeldinu hroðaleg“

Hanna tekur sérstaklega til umfjöllunar þá staðreynd að fyrir nokkru steig ung kona fram og sagði frá hópnauðgun sem hún mun hafa orðið fyrir árið 2010. Við dreifingu sögunnar á samfélagsmiðlum mátti skilja að um væri að ræða þekkta íslenska knattspyrnumenn.

„Lýsingin á ofbeldinu er hroðaleg og glæpurinn varðar við margra ára fangelsi,“ skrifar Hanna.

„ Það hafði þó ekki meiri áhrif á gerendurna (landsliðsmennina) en svo að þeir gerðu grín að nauðguninni daginn eftir. Forherðingin algjör. Í frásögninni kemur fram hvaða afleiðingar þessi unga kona hefur þurft að burðast með. Lýsingin er þyngri en tárum taki. Þolandanum var eindregið ráðlagt að kæra ekki, við ofurefli væri að etja.“

Þá segir hún að til séu fleiri frásagnir af landsliðsmönnum sem sagðir eru beita beita konur ofbeldi, kynferðislegu og heimilisofbeldi.

„Þetta virðist ekki hafa haft nein áhrif á velgengni þessara manna. Þeim er hampað og njóta mikilla vinsælda meðal þjóðarinnar. Þöggunin er alger, og KSÍ ber vitaskuld ábyrgð á henni.“

Tvær leiðir færar fyrir KSÍ

Hún segir sömu spurninguna brenna á mörgum.

„Ætlar KSÍ að halda áfram að þagga niður ofbeldi sem gerendur á þeirra vegum hafa beitt? Að vera gerendameðvirk og fórna stúlkum og konum á altari keppniskarla? Er það afstaða sem hreyfingin vill standa fyrir?“

Knattspyrnusambandinu séu í því samhengi tvær leiðir færar, „annars vegar að halda áfram að senda þau skýru skilaboð til stráka og karla að þeir geti beitt konur miskunarlausu ofbeldi, án þess að það hafi nokkur áhrif á velgengni þeirra og því síður að þeir þurfi að axla ábyrgð á gerðum sínum.

Skilaboðin til stúlkna og kvenna frá KSÍ eru að þær þurfi að sætta sig við ofbeldið af hálfu karla og þegja yfir því, annars verði þær sakaðar um lygi. Að ofbeldismenning sé sjálfsögð og eðlileg. Að mikilvægi karla sé óumdeilanlega meira en kvenna.“

Hin leiðin fyrir KSÍ sé að verða hluti af lausninni, „að rjúfa vítahring ofbeldis, þöggunar og kvenfyrirlitningar. Taka skýra afstöðu með þolendum, jafnrétti og réttlætinu,“ skrifar Hanna og bætir við að lokum:

„Þögnin er ekki hlutlaus – heldur afstaða með ríkjandi ástandi.

Ég óska KSÍ þess að þar láti fólk ekki kappið og gerendameðvirknina bera siðferðið ofurliði. Ég óska þess að KSÍ taki af skarið af styrk, hugrekki og samfélagslegri ábyrgð - fyrir okkur öll og fyrir framtíðina.“