Telja vel unnt að halda stóra viðburði

„Það er eins og önnur lönd hafi tekið fram úr okkur hvað það varðar að læra að lifa með veirunni. Hvernig getum við séð 60 þúsund manns á fótboltaleikjum og 300 þúsund manns á tónlistarhátíðum vandræðalaust í löndum sem eru með miklu lægra bólusetningarhlutfall en við erum með, en það má ekki skipta Eldborg upp í þrjú 500 manna svæði?“ segir Ísleifur B. Þórhallsson, tónleikahaldari hjá Senu Live og formaður Bandalags íslenskra tónleikahaldara.

Samráðshópur íslenskrar tónlistar sendi í gær bréf á ráðamenn þar sem rakið er hversu lamandi núverandi takmarkanir eru á tónlistariðnaðinn. Í bréfinu er skorað á ráðamenn að slaka á fjöldatakmörkunum og bent á að vel hafi gefist í öðrum löndum að halda stóra viðburði án þess að upp hafi komið hópsmit.

Í bréfi hópsins er farið fram á að samkomur verði heimilar fyrir allt að 500 manns í hverju sóttvarnahólfi án sérstakra nándartakmarkana, enda gæti viðburðahaldarar þess að gestir framvísi neikvæðri niðurstöðu úr nýlegu hraðprófi eða sjálfsprófi en slíkt hafi gefist vel við viðburðahald erlendis.