Hitabylgja í kortunum á Akureyri

Hlý tunga sunnan úr höfum á eftir að teygja sig yfir Norðurlandið og Austurlandið í næstu viku og fer hitinn mest í 24 gráður í Ásbyrgi og 22 gráður á Akureyri á þriðjudag.

Þokkalega hlýtt verður á Norðurlandi í dag og á morgun en það hlýnar seinnipartinn á mánudaginn að sögn Birgis Arnar Höskuldssonar, veðurfræðings. 

„Þetta er hlý tunga sem ætlar að teygja sig frá Spáni og hingað og ætti að vera hérna í tvo til þrjá daga,“ segir hann, eða frá mánudegi til miðvikudags.

Rigning á höfuðborgarsvæðinu á meðan

Þá hlýnar allverulega á Austurlandi um hádegið á þriðjudag en þá er spáð 22 gráðum á Egilsstöðum og 23 gráðu hita á Seyðisfirði.

Höfuðborgarbúar fá ekki að njóta góðs af þessari hitabylgju en á mánudaginn er spáð um 15 til 16 gráðum og rigningu á mánudag til miðvikudags.

Veðurvefur mbl.is

• Blogga um frétt