Lenti í sandbleytu og festist

„Rútan lenti í sandbleytu og það voru búnir að vera töluverðir vatnavextir. Við erum búin að taka allan farangur og flest virðist hafa sloppið,“ segir Ársæll Hauksson, eigandi ferðaskrifstofunnar Southcoast Adventures.

Rúta á vegum fyrirtækisins var að flytja ferðafólk, aðallega Íslendinga, úr Þórsmörk þegar rútan lenti í sandbleytu í Krossá með þeim afleiðingum að hún festist. Öllum þeim þrjátíu sem voru um borð var bjargað úr rútunni laust eftir hádegi.

Frétt af mbl.is

Þrjátíu bjargað úr rútu í Krossá

„Megnið af fólkinu var að koma úr Laugarvegsgöngu. Björgunaraðgerðir gengu ótrúlega vel, það voru komnir bílar frá okkur og fólk úr nágrenninu. Fólki var hjálpað útúr rútunni og beint á bakkann og bílar frá okkur komu og fluttu fólkið heim skömmu síðar,“ segir hann.

Rútan er ekki í góðu ásigkomulagi að sögn Ársæls: „Það er hellingsvinna eftir þar sem það þarf að þurrka allt, því það er vatn innan um allt. En þetta fór eins farsællega og hægt var,“ segir Ársæll að endingu.

• Blogga um frétt