Ekki er búist við að hlaupið í Skaftá muni valda miklum skemmdum en Veðurstofa fundaði í dag vegna stöðunnar og var ekki talin þörf á því að rýma svæði eða loka vegum, að sögn Huldu Rós Helgadóttur, náttúruvársérfræðings hjá Veðurstofu Íslands.

Veðurstofa tilkynnti í dag að hlaup væri hafið í Skaftá og þykir líklegt að upptök þess séu úr Vestari-Skaftárkatli.

Frétt af mbl.is

Hlaup hafið í Skaftá

„Við erum með vakt allan sólarhringinn og fylgjumst vel með þessu. Almannavarnir hafa lýst yfir óvissustigi sem eru viðbrögð þeirra við svona atburðum. Það er ekki búist við því að þetta verði mjög stórt en við bregðumst við ef það stækkar meira en búist var við. Þá þyrfti mögulega að grípa til frekari aðgerða,“ segir Hulda.

Fólk á að forðast lægðir vegna gasmengunar

Segir hún jafnframt mestu hættuna nú stafa af gasmengun og eru því vegfarendur beðnir um að halda sig frá upptökum árinnar sem og lægðum í landslagi.

„Það er hægur vindur á svæðinu og þá er líklegra að gas setjist fyrir í lægðum og það getur orðið hættulegt fólki. Gasmengunin ætti ekki að vera í miklu magni við Kirkjubæjarklaustur en Umhverfisstofnun er komin með mæla þar til að mæla brennisteinsvetni.“

Búist er við að hlaupið nái hámarki á næstu dögum en lítil hlaup eiga það til að dreifast yfir lengri tíma að sögn Huldu. Ólíklegt þykir þó að áin flæði yfir bakka sína við Kirkjubæjarklaustur.

Tengdar fréttir

Skaftárhlaup 2021

Skaftárhlaup raskar ekki ró bændanna

• „Áin er ljót innfrá“
• Stutt í að hlaupið komi undan jökli
• Búist við að íshellan lækki um allt að 100 metra
• Missir ekki svefn yfir Skaftárhlaupi

» Fleiri tengdar fréttir

• Blogga um frétt