Flokkur fólksins eyddi mest

„Mér sýnist ljóst að allir flokkar hafi eytt tugum milljóna,“ segir Andrés Jónsson almannatengill um nýafstaðna kosningabaráttu. Mikið var auglýst síðustu vikurnar og sýnir greining sérfræðinga hjá Sahara að Flokkur fólksins var stórtækastur í auglýsingakaupum á samfélagsmiðlum. Miðflokkurinn eyddi litlu minna.

Alls eyddi Flokkur fólksins um 4,6 milljónum í auglýsingar á Facebook og Instagram á mánaðartímabili fyrir kosningar. Þá er vitaskuld ekki horft til umtalsverðra auglýsingakaupa í dagblöðum, á vefsíðum og í útvarpi og sjónvarpi.