Landspítalinn ráði ekki við dagleg störf

Stjórn Félags bráðalækna segir Landspítalann ekki ráða við dagleg störf. Félagið krefst tafarlausra aðgerða því réttindi sjúklinga séu fótum troðin. 

Stjórnin sendi heilbrigðisráðherra opið bréf í dag en þar segir að viðvarandi ófremdarástand á Landspítala hafi kristallast fyrr í vikunni þegar yfir 70 sjúklingar lágu á bráðamóttökunni. Þar af biðu 44 sjúklingar innlagnar en komust ekki á viðeigandi legudeildar sem voru fullar.

Ástandið stórhættulegt

„Bráðamóttakan ræður ekki við að sinna sínu hlutverki við þessar aðstæður. Svona ástand er stórhættulegt og kemur endurtekið upp á spítala sem er endalaust keyrður á yfirálagi með vanhæfa stjórn. Framkvæmdastjórn Landspítalans hefur með ráðaleysi sínu breytt Bráðamóttökunni í legudeild. Bráðveikum sjúklingum er allt of oft sinnt af veikum mætti á göngum spítalans,“ segir í bréfinu.

Stjórnin bendir á að hið óviðunandi ástand hafi farið hríðversnandi þrátt fyrir endurteknar alvarlegar ábendingar landlæknis sem hefur skilað yfir fimm skýrslum, greinargerðum og minnisblöðum. 

Landspítalinn stjórnlaus

Stjórnin segir að Landspítalinn sé í raun stjórnlaus en þar er engin virk álagsstjórnun. 

Í bréfinu segir að með aðgerðaleysi sínu og stjórnleysi hafi heilbrigðisráðherra látið ástandið viðgangast allt of lengi og að síðasta ríkissjón hafi gert ástandið verra með vanfjármögnun heilbrigðiskerfisins og óskynsamlegum inngripum í kjaradeilur. 

„Íslenska þjóðin lifir við þá tálsýn að á Íslandi sé heilbrigðiskerfi sem er sambærilegt við önnur kerfi í norður Evrópu. Því fer fjarri,“ segir í bréfinu.

• Blogga um frétt