Gert er ráð fyrir nýju hverfi vestan Borgarbrautar á Akureyri samkvæmt nýjum drögum að deiliskipulagi sem kynnt voru í dag og birtar á vef bæjarins. Á hverfið að vera með 970 íbúðum og geta hýst 1.900-2.300 íbúa. Til samanburðar eru íbúar á Akureyri í dag tæplega 19.000 og gæti þetta nýja hverfi því staðið undir um 12% fjölgun íbúa í bænum.
Skipulagssvæðið er um 45 hektarar og afmarkast svæðið af lóðarmörkum við Urðargil, Vestursíðu og Borgarsíðu í austri, framhaldi af Síðubraut í norðvestri og af 100 m hæðarlínu í suðvestri.
Í tilkynningu frá Akureyri kemur fram að áætlað sé að íbúðirnar muni rísa á næstu árum og að markmiðið sé að byggja til vistvænt og grænt hverfi með sjálfbærni að leiðarljósi.Þar verði blágrænar ofanvatnslausnir, göngu- og hjólastígar í sérrými, kvaðir um trjágróður og aðgengi að útivistarsvæðum.
Miðað við drögin er gert ráð fyrir að íbúðir í fjölbýli verði 77-80% og 20-23% í sérbýli. Það þýðir að álíka mikið landsvæði fyrir undir fjölbýli og sérbýli.
Nýja hverfið er skipulagt fyrir vestan og ofan Síðuhverfi og fyrir norðan Giljahverfi. Gert er ráð fyrir að hæstu fjölbýlishúsin verði 7-9 hæðir í norðurenda hverfisins. Meðfram Borgarbraut verði svo 4 hæða fjölbýlishús og þar fyrir vestan 2-4 hæða randbyggð. Þar fyrir vestan verði svo sérbýli og minni fjölbýlishús á 1-2 hæðum.
Gert er ráð fyrir að uppbygging íbúðarbyggðar hefjist úr suðri vegna nálægðar við Síðuskóla. Þar er svigrúm fyrir fjölgun nemenda og því ekki talin þörf á að byggja grunnskóla á svæðinu ofan Borgarbrautar.
Í kynningu fyrir skipulagsdrögin er samanburður við önnur hverfi í bænum, en í Naustahverfi eru meðal annars 1.100 íbúðir, þar af 750 í fjölbýli og 350 í sérbýli. Í Hagahverfi eru 800 íbúðir, þar af 710 í fjölbýli og 90 í sérbýli. Er þéttleiki hverfanna 24 íbúðir á hektara og 38 íbúar á hektara. Í nýja hverfinu sem nú er lagt til að byggja er hins vegar þéttleiki upp á 28-30 íbúðir á hektara.
Frekari kynningargögn um skipulagstillöguna má finna hér og hér.