Fækkun presta skerðir velferðarþjónustu

Ólga er víða vegna tillögu sem nú liggur fyrir Kirkjuþingi um að fækka í sparnaðarskyni stöðugildum presta innan þjóðkirkjunnar um 10,5. Á Snæfellsnesi er til dæmis ætlunin að sameina prestaköll sem þrír prestar myndu þjóna í stað fjögurra nú. Þá er gert ráð fyrir að fækka stöðugildum presta á Vestfjörðum um tvö, eins og í þremur prófastsdæmum á Norður- og Austurlandi. Í Suðurprófastsdæmi yrði fækkað um eitt stöðugildi. Einnig yrði sérþjónustuprestum fækkað. Með þessu færu stöðugildi presta þjóðkirkjunnar úr 145 í 135 sem spara myndi um 190 millj. kr. ári.

Frétt af mbl.is

Segir presta uggandi um störf sín

Fjölgað á SV-horninu

Í minnisblaði segir að í tillögunni sé horft til mannfjölda, fjölda þjóðkirkjufólks, fjölda kirkna og messuskyldu, vegalengda og líklegrar íbúaþróunar. Þarna hangir líka á spýtunni að sóknir og prestaköll á SV-horninu verði sameinuð og prestum fjölgað þar. Til dæmis stendur til að fjölga um einn prest í Garðabæ vegna íbúafjölgunar þar. Ljóst þykir að áhrif af hugsanlegri fækkun presta kæmi skarpt fram víða úti á landi, þar sem staða kirkjunnar er að einhverju marki sterkari en á höfuðborgarsvæðinu.

„Þetta er allt á sama veginn. Læknisþjónusta, lögregla, prestar og fleira: þetta er allt verið að skera sem verður að skoðast í því samhengi að íbúum á mörgum svæðum úti á landi fækkar,“ segir Kristinn Jónasson, bæjarstjóri í Snæfellsbæ.

Vestra stendur til að sameina prestaköll á Staðastað, í Ólafsvík, Grundarfirði og Stykkishólmi og fækka um einn prest. „Úti á landi er kirkjan oft mikilvægur þáttur í velferðarþjónustunni. Þess utan er safnaðarstarfið mikilvægt og ákveðið lím í samfélaginu. Kirkjustarf er vissulega ekki hluti af rekstri sveitarfélagsins, en er hins vegar mikilvægur þáttur í lífi íbúa. Skerðing á þessari þjónustu er mjög varhugaverð og vegna þessa m.a. munum við bæjarstjórar á Snæfellsnesi funda eftir helgina og óska skýringa,“ segir bæjarstjórinn.

Frétt af mbl.is

Brugðist við hallarekstri kirkjunnar

Vilja selja prestsbústaði

Fyrir Kirkjuþingi liggur tillaga um að seldar verði ýmsar jarðir og fasteignir í eigu þjóðkirkjunnar. Þarna eru undir m.a. tvö íbúðarhús í Vestmannaeyjum, það er við Hólagötu og Smáragötu, sem hafa verið prestsbústaðir. Hugmyndum um sölu eignanna er harðlega mótmælt í erindi sem Eyjaprestarnir Guðmundur Örn Jónsson og Viðar Stefánsson hafa sent þingfulltrúum. Þar segir að þau sem starfi í Eyjum geti aðstæðna vegna ekki búið annars staðar og húsnæði á staðnum sé gulrót. Einnig séu sterk tengsl milli safnaðarins og presta í Eyjum og þar vegi búseta þungt.

Einnig eru uppi hugmyndir um að selja prestsbústaðinn á Fáskrúðsfirði og kirkjujörðina Kolfreyjustað sem er skammt utan við kauptúnið. Þeim hugmyndum er mótmælt af kirkjunnar fólki eystra og eru rökin samtóna því sem sagt er í Eyjum.