Mikill fjöldi fólks mætti í kórónuveiruhraðpróf á Suðurlandsbraut í morgun og vann starfsfólk heilsugæslunnar sleitulaust í um tvo og hálfan tíma við að klára að skima röðina af fólki sem mætti nánast allt á sama tíma. Sífellt bættist í röðina en að lokum tókst að stytta hana niður í ekki neitt fyrir hádegi í dag. 

„Við höfum nú oft séð lengri raðir en þetta,“ segir Ingibjörg Salóme Steindórsdóttir, verkefnastjóri hjá Heilsugæslunni á höfuðborgarsvæðinu. „Það komu allir á sama tíma en við reyndum bara að vinna hratt.“

Hraðpróf ekki fyrir fólk með einkenni

Fólk sem mætir í hraðpróf kemur þangað af ýmsum ástæðum, ef það hefur verið í smitgát, er á leið á stóran viðburð eða er nýkomið heim frá útlöndum. Ingibjörg tekur skýrt fram að fólk eigi ekki að taka hraðpróf eða heimapróf ef það er með einkenni Covid-19 en borið hefur á misskilningi um það.

Frétt af mbl.is

144 kórónuveirusmit innanlands

„Það er líka gríðarlega mikilvægt að þegar fólk er með einkenni fari það ekki í hraðpróf eða heimapróf heldur PCR-próf, þ.e. einkennasýnatöku, og haldi sig heima þar til niðurstaða berst. Veiran er mjög víða og með því að gera þetta svona drögum við úr líkunum á því að fólk haldi áfram að smita frá sér ef það er smitað.“

Smitum hefur fjölgað í samfélaginu á síðustu dögum og segir Ingibjörg að starfsfólk skimunar á Suðurlandsbraut finni fyrir auknu álagi í takt við vaxandi smitfjölda.

Frá biðröð í hraðpróf í morgun. mbl.is/Auðun

Tengdar fréttir

Kórónuveiran Covid-19

Ekkert um alvarleg veikindi

• Skyldasti ættingi SARS „var í þeirra eigin ísskáp“
• Almenningur fékk ekki nægan aðgang að samningum
• Við höfum „runnið til baka niður brekkuna“
• Grípa til aðgerða: Covid-19 breiðist hratt út

» Fleiri tengdar fréttir

• Blogga um frétt