Skólar opnaðir aftur á Akranesi
Setja bókamerki
Skólar og stofnanir á frístundasviði á Akranesi verða opnuð aftur á morgun en skólarnir voru lokaðir á föstudag og eftir hádegi á fimmtudag vegna fjölda kórónuveirusmita sem greindust á Akranesi á miðvikudaginn.
„Núna erum við búin að taka ákvörðun um það að allar stofnanir og skólar á frístundasviði sem eru í rauninni leikskólar, grunnskólar, tónlistarskóli og frístundastarf muni verða með starfsemi á morgun,“ segir Sævar Freyr Þráinsson, bæjarstjóri Akraneskaupstaðar, í samtali við mbl.is.
Í gær voru starfsmenn leik-, grunn-, tónlistarskóla og frístundastarfs á Akranesi skimaðir fyrir veirunni. Að sögn Sævars var þátttakan góð og mættu ríflega 250 starfsmenn í skimun en enginn þeirra reyndist smitaður. Þrjú smit greindust þó á Akranesi í gær en þau greindust utan þessa hóps.
Að sögn Sævars ræddu þeir Þórir Bergmannsson, sóttvarnalæknir Vesturlands, saman í morgun. „Honum sýndist að við værum að ná toppnum á þessum smitum sem hafa komið hérna á Akranesi og það er útlit fyrir að þetta snögga inngrip, að loka, sé að byrja að virka hjá okkur. Við erum síðan búin að fara í þessar víðtæku skimanir og sýnatöku í samstarfi við sjúkrahúsið.“
Skólastarfið mun þó að sögn Sævars sæta einhverjum skerðingum í þeim tilfellum þar sem starfsmenn eða börn eru í einangrun eða sóttkví.
Foreldrar fá upplýsingar í dag
Að sögn Sævars mun hver og einn skóli á Akranesi senda foreldrum upplýsingar í dag um hvernig starfsemi verði háttað.
„En það er auðvitað með fyrirvara um það að staðan breytist ekki frá því sem hún er í dag,“ segir Sævar og bendir á að til dæmis hafi börn verið skimuð fyrir veirunni á heilsugæslunni á Akranesi í dag og að niðurstöður úr þeim verði ekki komnar fyrr en í kvöld.
Náðun stuðningsmanna Trump vekur ólík viðbrögð
Skotinn til bana við skyldustörf
„Ég hef verið kjaftaskur mikill“
Aflétta rýmingu ef spá gengur eftir
Vonast til að menn sjái alvöru málsins
Ákvörðun Trumps veldur titringi
Ráðast í átak eftir smitið á Mánagarði
MDE: Brotið á Jóhannesi í BK-44 máli