Í formlegri sendinefnd Íslands, sem sækir loftslagsráðstefnu Sameinuðu þjóðanna (COP26), sem stendur nú yfir í Glasgow, eru 26 einstaklingar.

Auk ráðherra og fulltrúa frá ráðuneytum eru í formlegu sendinefndinni fulltrúi Umhverfisstofnunar, Veðurstofunnar, Landgræðslunnar, Loftslagsráðs og Orkustofnunar. Þá styrkir umhverfis- og auðlindaráðuneytið fulltrúa frá Landssambandi ungmennafélaga til þátttöku á fundunum, en þetta er í fyrsta skipti sem fulltrúi ungmenna er í opinberu sendinefndinni. Þetta kemur fram í skriflegu svari frá umhverfis- og auðlindaráðuneytinu.

Ráðstefnan hófst þann 31. október og stendur til 12. nóvember, en ekki eru allir fulltrúar Íslands þar á sama tíma.

Katrín Jakobsdóttir forsætisráðherra tók þátt í leiðtogaráðstefnu aðildarríkjaþings Loftslagsamningsins, sem haldin var í upphafi fundar og Þórdís Kolbrún Reykfjörð Gylfadóttir, ferðmála- og nýsköpunarráðherra, sótti einnig ráðstefnuna í síðustu viku. Guðmundur Ingi Guðbrandsson, umhverfis- og auðlindaráðherra, sækir hins vegar ráðstefnuna í þessari viku.

Fyrir utan íslensku sendinefndina sækja einnig fundinn aðilar frá Reykjavíkurborg, umhverfisverndarsamtökum, lífeyrissjóðum, Grænvangi og ýmsum fyrirtækjum sem tengjast orkugeiranum, alls 59 manns.

Tengdar fréttir

Loftslagsráðstefnan COP26

Loftslagsfundur Festu og Reykjavíkurborgar

• Súrsæt niðurstaða COP26
• Aðild að bandalagi gegn olíuvinnslu verið rædd
• Uppþot á blaðamannafundi: „COP26 misheppnaðist“
• Indland og Kína þurfi að svara fyrir sig

» Fleiri tengdar fréttir

• Blogga um frétt