„Ég hef talað um það undanfarna daga að það þurfi að bregðast við,“ segir Þórólfur Guðnason sóttvarnalæknir, í samtali við mbl.is. Fjöldi fólks hefur greinst með kórónuveiruna undanfarna daga en í gær greindust 200; sem er metfjöldi.
Guðlaug Rakel Guðjónsdóttir, starfandi forstjóri Landspítalans, vill að sóttvarnaaðgerðir verði hertar strax til að ná tökum á faraldrinum. Spurður hvort hertar aðgerðir séu á teikniborðinu segir Þórólfur:
„Þróunin er nánast ómöguleg og jú, það er á teikniborðinu hjá mér.“
Hann segist ætla að skila minnisblaði fyrir helgi en vill ekkert segja til um innihald þess áður en ráðherra ákveður hvernig eigi að bregðast við.