Landsréttur vildi ekki þyngja dóm vegna kynlífsmyndbands

Landsréttur staðfesti í dag dóm yfir karlmanni sem hafði verið dæmdur í tveggja mánaða fangelsli í héraðsdómi fyrir að hafa brotið gegn blygðunarsemi konu með því að hafa sýnt af sér lostugt athfæi með því að taka upp mynd­bönd og mynd­ir af sér og konu stunda kyn­mök án vitn­eskju konunnar. 

Honum var hins vegar gert að greiða konunni 300 þúsund krónur í stað 200 þúsund króna sem héraðsdómur hafði dæmt hann til að greiða. Þá fellur allur áfrýjunarkostnaður á hann.

Maðurinn áfrýjaði málinu til Landsréttar, en saksóknari krafðist þyngri refsingar yfir manninum. Eru brot hans sögð varða við 209. grein almennra hegningarlaga.

Fram kem­ur í dómn­um að brotaþoli hafi leitað á neyðar­mót­töku Land­spít­al­ans 29. des­em­ber 2019 þar sem hún kvaðst hafa verið að skemmta sér á skemmti­stað um nótt­ina þar sem hún hafði hitt ákærða og þau farið sam­an á heim­ili hans þar sem þau hefðu haft sam­far­ir með samþykki þeirra beggja.

Á meðan á sam­förun­um stóð hafði brotaþoli séð ákærða taka upp mynd­band eða mynd­ir af henni á síma sinn. Hún hefði ekki gefið hon­um leyfi fyr­ir slíkri mynda­töku og hefði sagt hon­um að hætta og eyða mynd­un­um. Hefði henni virst sem ákærði hefði orðið við því en talið hugs­an­legt að hann ætti af­rit af mynd­un­um í sím­an­um. Þá kem­ur fram í dóm­in­um að brotaþoli hafi tvisvar þurft að leita sér sál­fræðiaðstoðar vegna at­viks­ins og að málið hafi valdið henni van­líðan. 

Sagðist maðurinn fyrir héraðsdómi hafa stjórnað tónlist úr farsíma sínum á meðan á kyn­mök­um stóð, en eft­ir stutta stund hefði hann síðan í kæru­leysi byrjað að taka mynd­ir og stutt mynd­skeið. Hann hefði hætt því og eytt mynd­efn­inu þegar brotaþoli bað hann um það. 

Fram kemur í dómi Landsréttar að með vísunar til forsendna fyrri dóms verði hann staðfestur fyrir utan bætur til konunnar sem voru sem fyrr segir hækkaðar um 100 þúsund krónur.

• Blogga um frétt