Landsmenn lesa minna en áður

Þeim Íslendingum sem ekki lesa bækur fer fjölgandi á milli ára og konur lesa enn meira en karlar. Þá er hlustun á hljóðbækur óbreytt milli ára. Það er meðal þess sem kemur í ljós í nýrri könnun á lestri.

Könnunin leiddi í ljós að fólk las að meðaltali 2,3 bækur á mánuði, sem er svipað og áður en Covid-19-faraldurinn brast á en þá jókst bóklestur. Marktækur munur er á lestri milli aldurshópa en þeir sem eru 18 til 24 ára lásu til að mynda mun færri bækur en þeir sem eldri eru og hefur lestur dregist nokkuð mikið saman hjá þeim hópi samanborið við könnunina í fyrra.

Um 68% svarenda höfðu lesið eða hlustað á bók/bækur á síðastliðnum 30 dögum. Konur lesa að jafnaði 3,1 bók á nánuði en karlar 1,5.