200 tonn á ári í klósettið

Alþjóðlegur dagur klósettsins rennur í garð á morgun. Ljóst er að fólk heldur daginn mishátíðlega en Umhverfisstofnun nýtir þó tilefnið til þess að minna, í tilkynningu sinni, á átaksverkefnið „Bara piss, kúk og klósettpappír í klósettið.“

Tæplega 200 tonn af ýmsum óæskilegum úrgangi finnast árlega í fráveitum um land allt. Magnið samsvarar því um hálfu kíló á hvern landsmann af úrgangi sem fer í klósettið á hverju ári, er fram kemur í tilkynningu Umhverfisstofnunar.

Óumhverfisvænt og kostnaðarsamt

Úrgangur í fráveitu er þá landlægt vandamál sem ekki bara skaðar umhverfið og þyngir rekstur fráveitukerfa, heldur getur kostnaður sveitarfélaga vegna hreinsunar og förgunar á rusli í fráveitum hlaupið á tugum milljóna á ári hverju.

Helst eru það þá blautþurrkur, sótthreinsiklútar, smokkar, tannþráður og eyrnapinnar sem landsmenn sturta niður og síðan þarf að hreinsa úr fráveitukerfinu.

Klósettlag

Eins og áður segir þá minnir Umhverfisstofnun á átaksverkefnið „Bara piss, kúk og klósettpappír í klósettið“ en verkefnið er samvinnuverkefni Umhverfisstofnunar og Samorku í samstarfi við Samband íslenskra sveitarfélaga og heilbrigðisnefnda um land allt.

Markmið verkefnisins er að draga úr rusli í fráveitu og draga um leið úr álagi á umhverfið. Í fyrra var þá gefið út lag í tilefni verkefnisins og því jafnvel vert að spila það á morgun í tilefni dagsins.

• Blogga um frétt