Bíða eftir hlaupi úr Grímsvötnum
Setja bókamerki
Engin merki eru um að hlaup sé hafið í Grímsvötnum ennþá. Grannt er þó fylgst með þróun mála á svæðinu. Þetta segir Bryndís Ýr Gísladóttir, náttúruvársérfræðingur hjá Veðurstofu Íslands, í samtali við mbl.is.
„Það er bara sama staða og var uppi í gærkvöldi. Við erum ekki farin að sjá neitt í ánum eða neitt þannig við bíðum bara ennþá eftir því.“
Telja hlaup líklegt í dag eða á morgun
Vísindaráð almannavarna fundaði um stöðuna í Grímsvötnum í gær þar sem íshellan þar var tekin að síga.
Það að íshellan sé tekin að síga getur verið vísbending um að Grímsvatnshlaup sé í vændum og dæmi eru um að eldgos verði í Grímsvötnum eftir að vatn hleypur þaðan.
Í kjölfar fundarins var gefin út tilkynning á vef Veðurstofunnar þar sem segir að allar líkur séu á því að vatn sé farið að streyma úr Grímsvötnum og að von sé á hlaupi í Gígjukvísl. Þar segir einnig að íshellan í Grímsvötnum hafi sigið 60 sentímetra á síðustu dögum og hraðinn aukist.
Engin aukning mælst í rafleiðni við Gígjukvísl
Of snemmt sé þó að fullyrða um hvert umfang hlaupsins geti orðið en miðað við mælingar á vatnsstöðunni í Grímsvötnum í gær má reikna með að hámarksrennsli þess verði um 5.000 m3/s. Slíkt rennsli hefði lítil áhrif á mannvirki á borð við vegi og brýr.
Miðað við fyrri hlaup megi gera ráð fyrir að hlaupvatn komi fram við jökuljaðar í dag eða á morgun og muni það ná hámarki á 4 til 8 dögum eftir það, að því er greint frá í tilkynningunni.
Engin aukning hafi mælst í rafleiðni í Gígjukvísl eð það er skýrasta merki þess að hlaupvatn sé komið undan jöklinum. Veðurstofa er með gasmæla við upptök Gígjukvíslar sem einnig gæfu vísbendingar um hvort hlaupvatn sé í farveginum og er því grannt fylgst með þróun mála á svæðinu.
Síðast hljóp úr Grímsvötnum í júní 2018 en ekki hefur gosið úr þeim síðan 2011.
Mæðgur dæmdar til að greiða 64 milljónir
Hótar Bretum og Bandaríkjamönnum
Myndir: Grindavíkurvegur aftur undir hraun
Drónamyndskeið frá hápunkti gossins í nótt
Maskína: Framsókn í fallbaráttu
„Má segja að þetta gos hafi þjófstartað“
Úlfar: Heppileg tímasetning á gosinu
Mjög alvarlegt ef Njarðvíkuræð gefur sig