Reykjavíkurborg sýknuð af kröfu Sérverks

Landsréttur sýknaði í dag Reykjavíkurborg af kröfu Sérverks ehf. um endurgreiðslu á rúmum 120 milljónum króna auk dráttarvaxta sem fyrirtækið hafði greitt vegna innviðagjalda árið 2018.

Frétt af mbl.is

Borginni stefnt vegna innviðagjalds

Dómur Héraðsdóms Reykjavíkur hefur því verið staðfestur en málskostnaður var lækkaður í Landsrétti úr 1,9 milljónum króna í eina milljón sem Sérverk þarf að greiða Reykjavíkurborg í málskostnað. 

Sérverk taldi álagningu innviðagjaldsins ólögmæta og að tekjuöflun sveitarfélaga yrði að byggjast á heimildum í lögum.

Kunnugt um samkomulag í kaupsamningnum

Í dómnum segir að Sérverk keypti lóðina Kuggavog 5 af Vogabyggð ehf. árið 2017. Í kaupsamningnum segir meðal annars að kaupanda, Sérverk, sé kunnugt um samkomulag milli Vogabyggðar, Hamla og Reykjavíkur frá 2016 um skipulag, uppbyggingu og þróun á svæði í Vogabyggð Reykjavík.

Með kaupsamningnum yfirtók Sérverk öll réttindi og skyldur samkvæmt veðskuldabréfi sem Vogabyggð ehf. gaf út árið 2017 áður en kaupin áttu sér stað.

Uppgreiðsluverð þess í október 2018 var um 120 milljónir króna. Sérverk krafðist í bréfi til Reykjavíkurborgar í september 2019 að innviðagjaldið yrði endurgreitt en borgin hafnaði því alfarið. 

• Blogga um frétt