Í varðhaldi vegna gruns um ítrekuð brot gegn börnum

Karlmaður á sjötugsaldri var í dag úrskurðaður í fjögurra vikna gæsluvarðhald í Héraðsdómi Reykjavíkur vegna gruns um fjölmörg brot gegn börnum. Þá var karlmaður á fertugsaldri úrskurðaður á mánudaginn í Héraðsdómi Reykjaness úrskurðaður í fjögurra daga gæsluvarðhald, eða til 10. desember vegna rannsóknar lögreglu á ætluðu kynferðisbroti.

Í tilkynningu frá lögreglunni á Höfuðborgarsvæðinu segir að karlmaður á sjötugsaldri hafi verið úrskurðaður í dag í Héraðsdómi Reykjavíkur í fjögurra vikna gæsluvarðhald, eða til 6. janúar, að kröfu Lögreglunnar á höfuðborgarsvæðinu.

Segir í tilkynningunni að maðurinn sé grunaður um „fjölmörg brot gegn börnum, þ.e. blygðunarsemis- og barnaverndarlagabrot. Einnig fyrir að reyna að mæla sér mót við börn í kynferðislegum tilgangi.“ Féllst Héraðsdómur á kröfu lögreglustjóra eins og hún var sett fram, það er, að „uppfyllt séu skilyrði um að ætla megi að kærði haldi áfram brotum á meðan málum hans er ekki lokið og að nauðsynlegt sé að verja aðra gegn brotum hans.“

Úrskurðurinn hefur verið kærður til Landsréttar.

Í fjögurra daga gæsluvarðhald

Þá var í sömu tilkynningu greint frá því að karlmaður á fertugsaldri hefði á mánudaginn verið úrskurðaður í Héraðsdómi Reykjaness úrskurðaður í fjögurra daga gæsluvarðhald, eða fram til 10. desember, á grundvelli rannsóknarhagsmuna að kröfu lögreglunnar á höfuðborgarsvæðinu í þágu rannsóknar hennar á ætluðu kynferðisbroti.

Segir í tilkynningunni að úrskurðurinn hafi verið kærður til Landsréttar, en ekki er hægt að veita frekari upplýsingar um hvorugt málið að svo stöddu.

Frétt af mbl.is

Grunaður um að hafa nauðgað unglingsstúlku

• Blogga um frétt