Innlent | mbl | 13.12.2021 | 11:14 | Uppfært 11:30

Dóra setur Íslandsmet í langlífi

Dóra Ólafsdóttir sést hér á myndinni sem Áskell sonur hennar tók. Í bakgrunninum er skráning fæðingar og skírnar í prestsþjónustubók Grenivíkurprestakalls. Ljósmynd/Af Facebook-síðunni Langlífi

Dóra Ólafsdóttir á hjúkrunarheimilinu Skjóli í Reykjavík hefur nú náð hærri aldri en nokkur annar hér á landi. Dóra er fædd 6. júlí 1912 í Suður-Þingeyjarsýslu og er því orðin 109 ára og 160 dögum betur.

Frétt af k100.is

Heiðraði Dóru fyrir að ná hærri aldri en nokkur Íslendingur

Jensína Andrésdóttir á Hrafnistu í Reykjavík átti áður Íslandsmetið, 109 ár og 159 daga, en hún lést vorið 2019. Þetta kemur fram á Facebook-síðunni Langlífi sem Jónas Ragnarsson ritstýrir.

Frétt af mbl.is

Dóra Ólafsdóttir 108 ára í dag, elst Íslendinga

Þar segir, að í rúma fjóra áratugi starfaði Dóra sem talsímakona hjá Landsímanum á Akureyri. Þórir Áskelsson eiginmaður hennar var sjómaður og seglasaumari. Hann var áhugamaður um íslenskt mál og vinur Davíðs Stefánssonar skálds.

Þórir og Dóra voru gefin saman í hjónaband 15. febrúar 1943, bæði um þrítugt. Þau bjuggu á Norðurgötu 53. Þórir dó í desember 2000, 89 ára. Þegar Dóra var hundrað ára flutti hún til Áskels sonar síns í Kópavogi en Ása dóttir hennar býr í Bandaríkjunum. Síðar sama ár fór Dóra á Skjól.

Þá segir, að Dóra sé áttundi elsti íbúi á Norðurlöndum, elst er sænsk kona sem er rúmum fjórum mánuðum eldri. Aðeins einn Íslendingur hefur ná hærri aldri en Dóra. Það er Guðrún Björg Björnsdóttir sem var á fjórða ári þegar hún flutti með foreldrum sínum frá Vopnafirði til Vesturheims og var orðin 109 ára og 310 daga þegar hún lést, í ágúst 1998, á dvalarheimilinu Betel í Gimli í Manitoba í Kanada. Dóra getur bætt það met í maí á næsta ári.