Innlent | mbl | 27.12.2021 | 18:00 | Uppfært 20:44

„Jólin voru ekki gleðileg í ár“

Sigurður Þ. Ragnarsson þakkar fyrir þær hlýju kveðjur sem honum hafa borist.

Árni Þórður Sigurðarson, 29 ára piltur, liggur nú þungt haldinn á Landspítalanum vegna alvarlegrar fjölþátta líffærabilunar. Honum hefur verið haldið sofandi í öndunarvél í viku.

„Þetta er gríðarlegt áfall. Þetta er mjög efnilegur strákur. Hann fór í Íþróttaskólann á Laugarvatni, síðan réð hann sig sem tollvörð á Keflavíkurflugvelli og menntaði sig svo sem tollvörður. Framtíð hans er ekkert nema björt. Maður er orðinn óþreyjufullur að fara að sjá einhver merki um að hann sé á bataleið,“ segir faðir Árna, Sigurður Þ. Ragnarsson, í samtali við mbl.is.

Reynir að halda höfði

Sigurður segir fjölskylduna passa sérstaklega vel upp á sóttvarnir núna þegar svona mörg smit greinast daglega.

„Við erum í okkar kúlu og pössum að fara ekkert. Það er auðvitað heimsóknabann á spítalanum en þar sem hann er svo mikið veikur má einn koma og hann er þá sótthreinsaður í bak og fyrir.

Jólin voru ekki gleðileg í ár, þau voru erfið. Maður reynir að halda höfði. Það er ljóst að eftir svona áföll þarf maður sjálfsagt að leita sér aðstoðar til að ná jafnvægi í sitt líf aftur. Jafnvel þó að hann nái sér.“

Fagleg störf á spítalanum

Sigurður er einstaklega þakklátur starfsfólki spítalans og þeim sem hafa sent fjölskyldunni fallegar kveðjur og bænir.

„Ég er rosalega þakklátur læknunum og hjúkrunarfræðingunum á spítalanum fyrir fagleg störf. Manni finnst maður vera í góðum höndum. Mér þykir einnig óskaplega vænt um þennan samhug sem við höfum fengið. Fólk er að biðja fyrir manni og vona að allt fari vel.“