Ráðherra skoði ívilnanir vegna tengiltvinnbíla

Meirihluti efnahags- og viðskiptanefndar Alþingis beinir því til fjármála- og efnahagsráðherra að taka til skoðunar hvort tilefni sé til þess að framlengja ívilnanir vegna tengiltvinnbíla með einhverjum hætti, eða gera breytingar á fyrirkomulagi þeirra, áður en 15.000 tengiltvinnbíla markinu verði náð.

Gert er ráð fyrir því í frumvarpi um ráðstafanir vegna fjárlaga næsta árs, að fjár­hæð virðis­auka­skatt­sí­viln­un­ar vegna ten­gilt­vinn­bíla lækki um ára­mót­in úr 960.000 krón­um á hverja bif­reið í 480.000 krón­ur og falli al­veg niður þegar 15 þúsund ten­gilt­vinn­bíl­ar hafa verið skráðir á öku­tækja­skrá. Áætlað er að það ger­ist í í fe­brú­ar.

Bílgreinasambandið og fleiri samtök hafa gagnrýnt þessi áform og segja að þau muni hægja á orkuskiptum bílaflota landsmanna. Markmið stjórnvalda um kolefnislaust Ísland árið 2040 séu sett í uppnám.

Annarri umræðu um frumvarpið lauk fyrr í dag og efnahags- og viðskiptanefnd fjallaði um það á ný í kjölfarið. Í nýju áliti meirihluta nefndarinnar er ítrekuð sú skoðun að ekki séu forsendur til breytinga á fyrirkomulagi ívilnananna að svo stöddu, enda kalli breytingar á því á víðtækari endurskoðun, m.a. með hliðsjón af ríkisstyrkjareglum og skuldbindingu íslenskra stjórnvalda til þess að tilkynna breytingar á fyrirkomulaginu til Eftirlitsstofnunar EFTA.

Hins vegar beinir nefndarmeirihlutinn því til fjármála- og efnahagsráðherra að taka til skoðunar hvort tilefni sé til þess að framlengja framangreindar ívilnanir með einhverjum hætti, eða gera breytingar á fyrirkomulagi þeirra, áður en 15.000 tengiltvinnbifreiða markinu verði náð.

• Blogga um frétt