Ræningjarnir létu aftur sjá sig í Laugardalshöll
Setja bókamerki
Bólusetning barna á aldrinum fimm til ellefu ára fór fram annan daginn í röð í Laugardalshöll í dag. Frá hádegi hafa um 2.500 börn fengið sinn fyrsta skammt af bóluefni gegn Covid-19, sem gera ríflega tvöfalt fleiri en í gær, þegar um 1.200 börn mættu í fylgd forsjáraðila.
Þetta segir Ragnheiður Ósk Erlendsdóttir, framkvæmdastjóri hjúkrunar hjá Heilsugæslu höfuðborgarsvæðisins.
Ræningjarnir úr Kardemommubænum kíktu aftur í heimsókn í höllina í dag, börnunum til mikillar ánægju, en þegar blaðamaður náði tali af Ragnheiði mátti heyra óm af tónlist og skemmtanahaldi í bakgrunni.
„Þetta hefur gengið alveg einstaklega vel og runnið bara ljúflega í gegn.“
Foreldrar fá bólusetningu með börnum
Að sögn Ragnheiðar var mætingarhlutfallið nokkuð svipað og í gær, eða í kringum 70%, en um 3.500 börn á höfuðborgarsvæðinu fengu boð í bólusetningu í dag.
Gripu fjölmargir foreldrar einnig tækifærið og nýttu ferðina í Laugardalinn til þess að þiggja sinn örvunarskammt.
„Þetta virkar líka svo vel á börnin. Þá eru börnin að fá og foreldrarnir líka. Þá eru allir sáttir.“
Engir mótmælendur
Aðspurð segir Ragnheiður enga mótmælendur hafa verið sjáanlega fyrir utan höllina í dag. Hún veltir þó upp hvort að heimsóknin úr Þjóðleikhúsinu hafi haft eitthvað með það að gera.
„[Mótmælendurnir] létu ekki sjá sig. Nema ræningjarnir hafi rænt þeim, það gæti líka verið,“ segir hún glettin í bragði.
„Við munum grípa inn í“
Feðgar saman í Grænlandstúr á jólum
Býst við meiri aðsókn í janúar
38 létust í flugslysi
Í vinnunni á aðfangadagskvöldi í 25 ár
KEF Spa: „Eitthvað sem þú hefur ekki séð áður“