Mæðgur í 15 ára bann frá Hundaræktarfélaginu

Siðanefnd Hundaræktarfélags Íslands (HRFÍ) hefur hefur vísað mæðgum, sem ræktað hafa Schäfer hunda, í 15 ára bann frá allri þátttöku í félaginu. 

Úrskurðurinn tekur til sex brota meðal annars að hafa skráð vísvitandi ranga ræktunartík á nokkur pörunarvottorð við umsókn um ættbókarskráningu gota, að hafa brotið gegn skyldum sínum sem ræktendur með því að mæta ekki með hunda í lífsýnatöku til sönnunar á ætterni.

Þá eiga mæðgurnar einnig að hafa brotið gegn framkvæmdastjóra félagsins með meiðyrðum með því að saka hann um refsiverða háttsemi og freklega varpa rýrð á störf hans í þágu félagsins.

Héraðsdómur vísaði málinu frá

Mæðgurnar eru sviptar ræktunarnafni sínu Gjóska og útilokaðar frá rétti til að fá afhent ættbókarskírteini frá HRFÍ í 15 ár.

Stjórn HRFÍ kærði mæðgurnar til siðanefndar en héraðsdómur Reykjavíkur vísaði í vikunni frá máli sem mæðgurnar höfðuðu gegn HRFÍ. Mæðgurnar vildu meðal annars að dómstóllinn dæmdi ógildan úrskurð siðanefndar, sem var þá ekki búin að kveða upp úrskurð sinn.

• Blogga um frétt