Mál Ólafar tekið fyrir í Félagsdómi í dag

Munnlegur málflutningur fyrir Félagsdómi í máli Ólafar Helgu Adolfsdóttur, sem áður var trúnaðarmaður starfsmanna Icelandair á Reykjavíkurflugvelli og er núverandi varaformaður Eflingar, gegn Icelandair fer fram nú klukkan 14 í dag. Að sögn Magnúsar M. Norðdahl, lögfræðingi hjá ASÍ, er um að ræða lokahnykk málsins áður en það er svo lagt í dóm og kveðinn verður upp dómur að nokkrum dögum eða vikum liðnum.

Frétt af mbl.is

Málshöfðun vegna uppsagnar trúnaðarmanns

Málið snýr að uppsögn Ólafar hjá Icelandair í ágúst, en þá stóð hún í viðræðum við Icelandair um rétt­inda­mál starfs­manna en hún hef­ur sinnt störf­um sem trúnaðarmaður frá 2018 og sem ör­ygg­is­trúnaðarmaður Vinnu­eft­ir­lits­ins frá 2020.

Í stefn­unni var rök­stutt með vís­un í gögn sem komu meðal ann­ars frá starfs­fólki Icelanda­ir og SA, að upp­sögn­in hafi verið í bein­um tengsl­um við störf Ólaf­ar sem trúnaðarmaður. Slík upp­sögn er óheim­il sam­kvæmt lög­um 80/​1938 um stétt­ar­fé­lög og vinnu­deil­ur. Farið er fram á að upp­sögn Ólaf­ar hjá fé­lag­inu verði dæmd ólög­mæt.

Frétt af mbl.is

„Þetta er bara svo alvarlegt brot“

ASÍ rekur málið fyrir hönd Eflingar sem er með málið fyrir hönd Ólafar. Til varnar taka Samtök atvinnulífsins fyrir hönd Icelandair.

Þegar málið kom upp í fjölmiðlum í október sagði Icelandair að farið hefði verið að lögum og kjarasamningum sem og lögum sem kveða á um vernd trúnaðarmanna.

Frétt af mbl.is

Icelandair segist hafa farið að lögum

Í skriflegu svari Icelandair til mbl.is í október var sagt að ekki væri hægt að ræða málefni einstakra starfsmanna opinberlega. „Fé­lagið fer að lög­um og kjara­samn­ing­um og á það einnig við um lög sem kveða á um vernd trúnaðarmanna starfs­manna. Eins og fram hef­ur komið er fé­lagið ósam­mála full­yrðing­um Efl­ing­ar í um­ræddu máli,“ sagði hins vegar í svarinu.

Þetta er ekki eina málið þar sem Icelandair hefur þurft að svara fyrir sig í Félagsdómi að undanförnu. Í síðustu viku hafði Flug­freyju­fé­lag Íslands bet­ur gegn félaginu í Fé­lags­dómi og bar því flug­fé­lag­inu að aft­ur­kalla upp­sagn­ir út frá starfs­ald­urslista sum­arið 2020. 

Frétt af mbl.is

Flugfreyjurnar höfðu betur gegn Icelandair

Um 900 flug­freyj­um var sagt upp störf­um í apríl 2020 í kjöl­far far­ald­urs­ins og end­ur­skipu­lagn­ing­ar hjá Icelanda­ir. Sum­arið sama ár, þegar lín­ur tóku að skýr­ast í flug­geir­an­um var síðan 201 flug­freyja ráðin á nýj­an leik og fór flug­fé­lagið ekki eft­ir starfs­aldri. Niðurstaða Fé­lags­dóms, sem er end­an­leg, var að fé­lag­inu hafi verið skylt að aft­ur­kalla upp­sagn­irn­ar eft­ir starfs­aldri. Fé­lags­dóm­ur féllst á kröf­ur FÍ og er Icelanda­ir gert að greiða ASÍ 800 þúsund í máls­kostnað.

• Blogga um frétt