Samkvæmt fyrstu niðurstöðum úr rannsókn Íslenskrar erfðagreiningar á útbreiðslu Covid-19 hér á landi, sem ráðist var í byrjun árs, eru vísbendingar um að 20% Íslendinga hafi sýkst af sjúkdóminum frá upphafi faraldursins. Þetta kemur fram í pistil sóttvarnalæknis.
Segir þar að mótefni hafi verið mæld hjká 1.892 einstaklingum víðs vegar af landinu sem voru á aldrinum 20-90 ára.
„Helstu niðurstöður voru þær, að um 20% einstaklinga yngri en 50 ára mældust með mótefni gegn SARS-CoV-2 veirunni en voru heldur sjaldgæfari eldri einstaklingum. Vísbendingar eru því um að um síðustu áramót hafi um 20% Íslendinga sýkst af COVID-19 frá upphafi faraldursins.“
Miðað við þetta segir sóttvarnalæknir að ætla megi að rúmlega helmingi fleiri hafi raunverulega sýkst en hafi greinst með PCR-prófi. „Með sömu útreikningum og að því gefnu að um 1.500 manns smitist á hverjum degi þá má ætla að um 80% landsmanni hafi öðlast gott ónæmi gegn COVID-19 síðari hluta mars mánaðar,“ segir jafnframt í pistlinum.
Niðurstöður úr rannsókninni verða sendar í Heilsuveru á næstu dögum til þeirra sem tóku þátt í rannsókninni. Tekur sóttvarnalæknir fram að hafa þurfi í huga að mótefni í blóði segi ekki með óyggjandi hætti til um hversu vel varðir einstaklingar eru fyrir endursmiti. Þau séu hins vegar fátíð, en í dag hafi um 1.300 manns sýkst aftur af um 70.000 staðfestum smitum.
Fyrirhugað er einnig að mæla mótefni gegn S-próteini veirunnar og á þann hátt er hægt að greina þá sem myndað hafa mótefni eftir bólusetningu. Ekki er ljóst hvenær þessum mælingum mun ljúka en það verður auglýst betur þegar að því kemur.