Tæknilega flókin aðgerð framundan
Setja bókamerki
Framundan er tæknilega flókin aðgerð við að ná flaki flugvélarinnar sem fannst í Þingvallavatni í gærkvöldi og fólkinu sem í vélinni var upp á yfirborðið. Sú vinna fer fram samhliða rannsókn slyssins sem er í höndum rannsóknardeildar lögreglunnar á Suðurlandi og rannsóknarnefndar samgönguslysa. Tæknileg úrlausn hennar verður í höndum Landhelgisgæslu og sérsveitar ríkislögreglustjóra sem munu kalla til þá aðila sem til þarf.
Þetta kemur fram í tilkynningu frá lögreglunni, en flugvélin fannst á um 50 metra dýpi.
Næstu dagar verða nýttir til undirbúnings þess verkefnis. Til þess að það gangi vel fyrir sig þarf að vera veðurgluggi sem varir að minnsta kosti í tvo sólarhringa. Aðgerðinni fylgja umtalsverðar hættur fyrir björgunarlið og skiptir miklu að hún sé vel undirbúin.
„Stjórnendur aðgerða vilja koma á framfæri einlægum þökkum til björgunarsveita og viðbragðsaðila allra, sjálfboðaliða og einstaklinga sem boðið hafa fram aðstoð sína í formi leitar úr lofti og vatni, fæðis, gistiaðstöðu eða hverju þvi sem nöfnum tjáir að nefna og í raun einstök verðmæti sem felast í þeirri samheldni meðal landsmanna sem aðgerðin leiðir í ljós,“ segir í tilkynningunni.
Fram kemur að starfshópur Landhelgisgæslu og kafara sérsveitar ríkislögreglustjóra ásamt björgunarsveitum hafi um miðnætti í gær, með sónarmyndun, staðsett flak flugvélarinnar TF ABB á botni Ölfusvatnsvíkur í Þingvallavatni.
Í framhaldi af því var sendur kafbátur niður og með honum voru teknar ljósmyndir af flakinu sem staðfesta að um þessa tilteknu vél er að ræða. Í framhaldi lauk vinnu á vettvangi. Í nótt var unnið úr gögnunum og voru þau lögð fyrir á fundi aðgerðarstjórnar nú í hádeginu.
Dómur þyngdur um þrjú ár
Hópur fólks reyndi að komast að eldgosinu
Hentugt gos fyrst gýs á annað borð
Yfir 300 stæði fóru undir hraun
Nýtt fangelsi í landi Stóra-Hrauns tilbúið 2028
Viðræður ekkert þokast frá því á þriðjudag