Brekkurnar fullar í góða veðrinu

Fjöldi lagði leið sína á skíðasvæði í og í nágrenni við höfuðborgarsvæðið í dag, enda var gott veður til skíðaiðkunar. Talsverður fjöldi var saman kominn í Breiðholtsbrekkunni, en þar renndu ungir og aldnir sér á skíðum og snjóbrettum, auk þess sem margir voru á snjósleðum og þeystu niður brekkurnar.

Í Bláfjöllum og Skálafelli seldist upp í seinna hollið í dag, en vegna sóttvarnatakmarkana þarf að gæta að hámarksfjölda og er deginum skipt upp í tvö holl svo sem flestir geti nýtt sér svæðin.

Þegar klukkan 10:38 var tilkynnt að seinna hollið í Bláfjöllum væri orðið uppselt og tveimur tímum síðar var tilkynnt að uppselt væri í Skálafelli.

Um frostmark var á höfuðborgarsvæðinu í byrjun dags en kólnaði svo um 2 til 3 gráður þegar líða tók á daginn. Í Bláfjöllum voru -4 til -7 gráður í dag.