Heilbrigðisráðuneytið hefur kallað eftir að fleira heilbrigðisstarfsfólk skrái sig í bakvarðasveit vegna aukins álags á heilbrigðisstofnanir vegna vaxandi fjölda kórónuveirusmita í samfélaginu.
Þetta kemur fram í tilkynningu Stjórnarráðsins.
Mesta þörf er fyrir sjúkraliða, hjúkrunarfræðinga og lækna. Einnig er þó óskað eftir starfsfólki úr öðrum heilbrigðisstéttum. Þá geta nemar í hjúkrunarfræði, læknisfræði og sjúkraliðanámi skráð sig.
Innlögnum vegna Covid-19 hefur fjölgað mikið undanfarna daga samhliða því sem aukin forföll eru meðal starfsfólks vegna veikinda. Mönnunarvandi á Landspítala er aðkallandi en í morgun voru 249 starfsmenn spítalans frá vinnu í einangrun. Þá eru hátt í 50 starfsmenn á Sjúkrahúsinu á Akureyri einnig frá.
Eru þeir sem sjá sér fært um að veita liðsinni beðnir um að skrá sig.
Hér er hægt að sjá nánari upplýsingar ásamt skráningarformi.