Ráðherra hefur ekki svarað fyrir einveruherbergi

Mennta- og barna­málaráðuneytið hefur ekki skilað inn upplýsingum um hvort bregðast eigi við ábend­ing­um sem umboðsmaður Alþing­is setti fram í bréfi til ráðuneyt­is­ins, varðandi notk­un á ein­veru­her­bergj­um í grunn­skól­um, þrátt fyrir að viðbótarfrestur sé liðinn. Þetta staðfest­ir Skúli Magnús­son, umboðsmaður Alþing­is, í sam­tali við mbl.is.

Umboðsmaður sendi Ásmundi Ein­ari Daðasyni, mennta- og barna­málaráðherra, bréf þann 8. des­em­ber síðastliðinn og var upphaflega veittur frestur til 1. fe­brú­ar til að skila inn upplýsingum. Ráðuneytið óskaði eft­ir því að hann yrði fram­lengd­ur til 7. fe­brú­ar. Sá frestur er nú liðinn en engin svör hafa borist.

Næsta skref umboðsmanns er að senda ítrekunarbréf til ráðherra.

Ekki vís­bend­ing­ar um frels­is­svipt­ingu

Bréfið var sent í kjöl­far heim­sókna umboðsmanns í nokkra grunn­skóla vegna frum­kvæðis­at­hug­un­ar á notk­un ein­veru­her­bergja, sem ganga gjarn­an und­ir nafn­inu „gula her­bergið“. Það verklag tíðkast í ein­hverj­um grunn­skól­um að skilja börn frá sam­nem­end­um sínum og vista þau jafn­vel ein í slík­um her­bergj­um í þeim til­gangi róa þau niður. Gjarn­an er um að ræða börn með sérþarf­ir sem skort­ir úrræði í skóla­kerf­inu. Að minnsta kosti eitt slíkt mál hef­ur verið kært til lög­reglu.

Frétt af mbl.is

Ekki vísbendingar um frelsissviptingu nemenda

Upp­haf­lega óskaði umboðsmaður eft­ir upp­lýs­ing­um frá grunn­skól­un­um um aðstæður barna sem væru aðskil­in frá sam­nem­end­um sín­um. Eft­ir að svör höfðu borist frá skól­un­um fór umboðsmaður í heim­sókn­ir þangað.

Ekki komu fram vís­bend­ing­ar um nem­end­ur væru kerf­is­bundið látn­ir dvelja í ein­veru­her­bergj­um í svo lang­an tíma eða við þær aðstæður að jafnað yrði til frels­is­svipt­ing­ar.

Mál­inu verði fylgt eft­ir

Í bréfi til ráðherra vakti umboðsmaður hins veg­ar at­hygli á álita­efn­um sem heim­sókn­irn­ar leiddu í ljós og óskað er eft­ir því að ráðuneytið veiti upp­lýs­ing­ar um hvort það hygg­ist bregðast við þeim ábend­ing­um sem fram koma.

Frétt af mbl.is

Ráðlagt að kæra innilokun barns í skóla

Jafn­framt er vak­in at­hygli ráðherra á þeim vanda sem starfs­menn skól­anna lýstu vegna nem­enda með sérþarf­ir og al­var­leg­an hegðun­ar­vanda og kallað eft­ir skýr­ari af­stöðu ráðuneyt­is­ins til notk­un­ar ein­veru­her­bergja í því sam­bandi.

Skúli Magnús­son, umboðsmaður Alþing­is, sagði í samtali við mbl.is í síðustu viku að mál­inu yrði fylgt eft­ir þegar svör hefðu borist frá ráðuneyt­inu. Það færi þó að sjálf­sögðu eft­ir viðbrögðum ráðuneyt­is­ins.

• Blogga um frétt