Allt of margir ófaglærðir í útkallsliði lögreglu

Allt of hátt hlutfall ófaglærðra lögreglumanna er við störf í útkallsliði lögreglu sem hafa hvorki heimild né hafa öðlast þjálfun til að nota öll þau tæki sem lögregla býr yfir. Þetta kemur fram í yfirlýsingu frá stjórn Landssambands lögreglumanna í ljósi liðinna atburða. Stjórnin lýsir yfir þungum áhyggjum af öryggi lögreglumanna.

Frétt af mbl.is

Þrívíddarprentaðar byssur bagaleg þróun

„Hluti af útkallsliði lögreglu eru nemar sem eru skemur á veg komnir í almennri þjálfun lögreglumanna. Hafa verður í huga að almennir lögreglumenn, héraðslögreglumenn og afleysingamenn eru oftast fyrsta viðbragð í útkalli á vettvang. Ótti um eigið öryggi er verulegur og þessi störf sem áður þóttu spennandi í almennri löggæslu þykja nú lítt eftirsóknarverð sökum hættueiginleika og starfsálags ásamt því sem laun eru í engu samræmi við ábyrgð og álag í starfi,“ segir í yfirlýsingunni.

mbl.is/Eggert Jóhannesson

Fram kemur að í ljósi atburða síðustu daga, vikna og jafnvel ára sé brýn nauðsyn á að skipuleggja til framtíðar fjölgun lögreglumanna og hvernig sé best að viðhalda þeim fjölda, þekkingu og reynslu innan hinna ýmsu deilda lögreglunnar og þá sérstaklega í almennri löggæslu, enda séu það lögreglumennirnir sem komi iðulega fyrstir að öllum málum.

Frétt af mbl.is

Snýst um einstaklinga en ekki skipulagða starfsemi

„Þá teljum við að sú umræða sem hefur verið í fjölmiðlum um rafvarnarbúnað sem búnað í almennri löggæslu tengist ekki atburðum sl. daga en hins vegar þarf að skoða slíkan búnað gagngert til þess að tryggja öryggi lögreglumanna, en hafa ber í huga að til slíks búnaðar verður ekki gripið þegar skotvopnum er beitt,“ segir í yfirlýsingunni.

mbl.is/Eggert Jóhannesson

„Þá er enn fremur mikilvægt að ráðast í vinnu við greiningar á lagaumhverfi með það að markmiði að styrkja möguleika lögreglu til rannsókna þannig að lögregla hér á landi sé ekki eftirbátur og hafi yfir að ráða sambærilegum heimildum og lögregla í nágrannaríkjum, og sé þannig betur í stakk búin til að bregðast við skipulagðri glæpastarfsemi. Með öllu er óviðunandi að Ísland búi ekki yfir sambærilegum heimildum, t.d. til gagna- og upplýsingaskipta og nágrannalöndin, og hætta er á að Ísland sitji eftir í réttarþróun sem veikur hlekkur meðal ríkja í baráttu gegn skipulagðri brotastarfsemi, gegn netglæpum og annarri brotastarfsemi sem þrífst þvert á landamæri.“

• Blogga um frétt