Dreifa ofbeldismyndböndum á TikTok og Instagram

Myndskeið af ofbeldi milli barna á grunnskólaaldri koma á borð lögreglunnar í bylgjum. Börnin boða til átaka og deila síðan myndböndum af þeim á samfélagsmiðlum.

„Þessi hegðun er búin að vera þekkt um land allt í um tvö til þrjú ár, en þetta kemur í bylgjum,“ segir Oddur Árnason, yfirlögregluþjónn á Suðurlandi, í samtali við mbl.is.

Í gær var greint frá því að lög­regl­an væri nú í nánu sam­starfi við barna­vernd Árborg­ar vegna mynd­skeiða sem fund­ust. Þau sýna of­beldi barna hvert gegn öðru á Sel­fossi.

Oddur vildi ekki tjá sig um umrætt atvik þar sem um er að ræða barnaverndarmál.

Frétt af mbl.is

Myndskeið sýndu börn í slagsmálum

Getur fylgt börnunum út lífið

Oddur segir börnin oftast dreifa myndböndunum á samfélagsmiðlunum TikTok eða Instagram, en jafnframt sé þekkt að þeim sé hlaðið inn á síður á netinu sem ganga svo á milli barnanna. Hann hvetur foreldra til að vera meðvitaða um símanotkun barna sinna. 

„Oftast er þetta aldurshópurinn 13-16 ára. Þá förum við í þetta með barnaverndaryfirvöldum á viðkomandi stað til að ná utan um þetta en svo hvetjum við foreldra til að vera mjög meðvitaða um hvað er að gerast í þessum rafræna heimi sem börnin þeirra eru að alast upp í.“

Spurður hvort börnin séu oft í sama skólanum og þekkist vel segir Oddur það ekki endilega þurfa að vera.

Oddur hvetur foreldra til að fylgjast með símanotkun barna sinna. mbl.is/Sigurður Bogi

Börn sem hafa náð 15 ára aldri eru samkvæmt lögum sakhæf. Því segir Oddur að þau börn sem hafa náð sakhæfisaldri og taka þátt í að beita ofbeldi sem þessu geti átt von á því að það fylgi þeim út lífið.

• 1 blogg um fréttina

Bloggað um fréttina

• Jóhannes Ragnarsson: Myrkrahöfðinginn mengaði þau með sínu djöfullegu innræti