Snjórinn bauð bílaflota borgarbúa birginn

Björgunarsveitirnar sinntu 214 útköllum í gær, einkum vegna fastra bíla. Vel tókst að leysa verkefnin, sem flest voru í efri byggðum, en 120 manns tóku þátt í aðgerðunum.

Snjómokstursmenn á vegum Reykjavíkurborgar höfðu ekki undan að reyna að halda götum borgarinnar opnum þegar snjónum kyngdi niður. Hjalti J. Guðmundsson, skrifstofustjóri umhverfis- og skipulagssviðs Reykjavíkurborgar, telur líklegt að einhverjar húsagötur verði ekki færar fyrr en seinna í dag eða jafnvel á morgun. Mokstur byrjaði klukkan þrjú um nóttina og tókst að halda stofn- og tengibrautum að mestu opnum. „Þetta er alvöruvetur í fyrsta skipti í tvö til þrjú ár. Við erum með öll tæki og mannskap úti. Við reynum að vinna þetta eins vel og hratt og við getum.“

Mikið var um veglokanir og var fólk á illa útbúnum bílum beðið að halda sig heima. Vegirnir um Kjalarnes, Hellisheiði, Þrengsli og Mosfellsheiði lokuðust allir vegna veðurs og eru á óvissustigi til klukkan átta í dag. Fylgdarakstur fór fram frá Esjumelum að Hvalfjarðargöngum og til baka á meðan veður leyfði en það stóð stutt. Fjöldi fólks er því veðurtepptur enn í dag.

Þrátt fyrir vonskuveður varð minniháttar röskun á flugi íslensku flugfélaganna í gær. Þetta staðfesta Ásdís Ýr Pétursdóttir, upplýsingafulltrúi Icelandair, og Nadine Guðrún Yaghi, upplýsingafulltrúi Play.

Útlit er fyrir þokkalegt veður í dag þótt færðin verði til trafala fyrst um sinn.