Misjafnt hvað dropinn dugði

Bensínverð hefur ekki áður verið hærra í krónum en nú. Þó hafa bensínkaup stundum tekið þyngra í pyngjuna miðað við verðlagsþróun.

Kort/mbl.is

Runólfur Ólafsson, framkvæmdastjóri FÍB, hefur safnað upplýsingum um þróun bensínverðs um árabil og reiknað það til núvirðis.

Sett voru upp dæmi um hvað bíll sem eyðir átta lítrum á 100 km hefði komist langt á bensíni fyrir 10.000 kr. í febrúar 2007, 2012, 2017 og það sem af er febrúar 2022 miðað við meðalverð í sjálfsafgreiðslu hjá N1.

Runólfur segir að heimsmarkaðsverð á eldsneyti hafi oft verið hátt á árunum 2011-2014 og það skýrir hátt verð 2012. Í febrúar það ár kostaði lítrinn að meðaltali 249,65 kr. eða 301,88 kr. á núvirði. Heimsmarkaðsverðið er einnig mjög hátt nú og hefur ekki verið hærra í sjö ár.